KMD Aprezenta Motór 451 Atu Leilaun
DILI, 13 jullu 2020 (TATOLI)- Komandu Polísia Munisípiu Dili (KMD) liuhosi Seksaun Tránzitu hato’o ona pedidu ba Ministériu Públiku (MP) no Tribunál Distritál Dili (TDD) atu fó autorizasaun hodi halo leilaun ba motorizada hamutuk 451 ne’ebé ninia prosesu remata ona no na’in la ba foti.
Motorizada hamutuk 450 ne’e nu’udar sasán evidénsia ba kazu krime grave balun no asidente tráfegu sira ne’ebé polísia sira halo apreensaun hahú hosi tinan 2002 too agora ninia prosesu ba kazu sira rezolve hotu ona.
Motór hirak ne’e rai butuk iha arredores Polísia Munisípiu Dili too agora na’in ba motorizada la ba prosesu ka foti no la ba halo reklamasaun.
Komandante Polísia Munisípiu Dili, Superintendente Xefe Hendrique da Costa, deklara, iha semana kotuk nia parte ho Segundu Komandante Munisípiu Dili, Euclides Belo ba hala’o ona enkontru ho Prokuradór Distritál Dili, Jacinto Babo hodi haree prosesu ne’e.
“Ita servisu hamutuk ho Ministériu Públiku no Tribunál Distritál Dili nu’udar na’in ba prosesu atu haree no foti desizaun,” dehan Superintendente Xefe Henrique ba jornalista, ohin, iha Komandu Polísia Dili.
Iha parte seluk, Komandu PNTL liuhosi Seksaun Tránzitu Dili mós sei kontinua halo operasaun loro-loron kontrola movimentu transporte sira ne’ebé para arbiru iha estrada públiku sei aplikasaun sansaun multa ba Estadu.
PNTL mós sei halo operasaun maka’as iha Hera ba too Metinaro nian ne’ebé PNTL identifika kuaze loroloron área ne’ebé sidadaun sira halo movimentu ho transporte la uza kapasete inklui lori karreta no motór halai arbiru la kumpre regra sinais tránzitu nian.
Jornalista : Eugénio Pereira
Editór : Francisco Simões
