DILI, 14 jullu 2020 (TATOLI)–Ministra Solidariedade Sosiál no Inkluzaun (MSSI), Armanda Berta dos Santos, hateten iha posibilidade Governu liuhosi ekipa pagamentu MSSI sei atende fali lista naran reklamasaun no hein katak reklamante sira ne’e mós bele hetan sira-nia direitu.
Notísia Relevante: Governu Sei Selu Lista Reklamasaun Ba Faze Daruak
“Depois ekipa halo hotu tiha verifikasaun ba dadus ne’e, ita iha posibilidade atu atende fali naran reklamasaun no hein katak reklamante sira ne’e mós bele hetan direitu hanesan ho sira seluk,” dehan Armanda Berta dos Santos ba Agência TATOLI iha Palásiu Governu, Dili, tersa ne’e.
Tanba, Atuál Vise-Primeiru Ministru ne’e hateten, prosesu pagamentu iha Munisípiu 12 ramata ona no kontinua halo pagamentu iha Rejiaun Adminiatrativa Espesiál Oé-Cusse Ambeno (RAEOA) ne’ebé finaliza ona horisehik (segunda, 13/06/2020) no ohin ekipa pagamentu kontinua halo relatóriu hodi bele konklui.
Governante ne’e haktuir, pagamentu finaliza hotu no ekipa MSSI-MAE kontinua verifika ba dadus reklamasaun sira hosi munisípiu sira hotu, tan ida-ne’e mak ohin nia parte mai hasoru Primeiru-Ministru hodi relata progresu servisu sira ne’ebé MSSI hala’o tiha ona.
“Ohin, ha’u mai relata progressu servisu durante ne’e ba señór Primeiru-Ministru, Taur Matan Ruak, liuliu iha situasaun COVID-19, ita-nia estadu oferese programa subsídiu $200 ba família uma-kain iha territóriu Timor-Leste,” nia dehan.
Notísia Relevante: Pagamentu Subsídiu Ramata, Ekipa Pagamentu Rejistu Reklamasaun 11.833
Jornalista : Osória Marques
Editór : Cancio Ximenes
