DILI, 14 jullu 2020 (TATOLI)-Universidade Nasionál Timor Lorosa’e (UNTL) daudaun ne’e forma ona ekipa hodi halo prevensaun ba transmisaun surtu COVID-19 durante prosesu aprendizajen ba estudante sira.
“Ami hahú ona aula prejensiál iha segunda semana kotuk maibé ami iha ekipa kontrolu ida ne’ebé involve seguransa, no cliner sira inklui dosente balun atu akompañia movimentu estudante sira nian tanba se mak atu asesu ba UNTL obrigasaun tenke liuhusi kontrolu thermometer digitál,”informa Pro Reitór Asuntu Akadémiku Universidade Nasionál Timor Lorosa’e, Miguel Maia, ba Tatoli iha ninia servisu fatin segunda ne’e.
Tuir nia ekipa prevensaun UNTL nian halo vijilánsia másimu iha areadór universidade liliu destaka iha portaun entrada nian para bele kontrola movimentu estudante sira ba prevene transmisaun moras coronavirus.
“Ita mós taka avizu COVID-19 nian iha lidun universidade nian inklui avizu elektróniku ne’ebé universidade instala ona liuhusi radio universidade nian atu fó hanoin beibeik ba estudante sira labele haluha uza máskara no nafatin kumpre distansia sosiál,”dehan nia.
Miguel hateten prosesu aprendizajen la’o ona durante semana ida maibé movimentu estudante sira nian sei menus tanba prezensa estudante sira bazeia ba orariu ne’ebé determinadu husi UNTL.
UNTL iha Fakuldade hamutuk sia no Departementu 40-resin.
Jornalista : Tomé Amado
Editór : Agapito dos Santos
