BATUGADE, 20 jullu 2020 (TATOLI)- Komandu Polísia Nasional Timor-Leste (PNTL) liuhosi Diresaun Tránzitu Seguransa Rodoviária Nasionál (DTSRN), foin lalais ne’e, hala’o atividade ida hodi identifika fatin estabelesimentu Postu Integradu iha Fronteira-Batugade.
Adjuntu Diresaun Tránzitu Seguransa Rodoviária Nasional DTSRN, Inspetór Xefe Inocêncio da Costa Maria Freitas, dehan, objetivu hosi vizita ne’e maka haree fatin estabelesimentu Postu Integradu tanba iha Dekretu Lei Nᵒ.28/2017 de 2 de Agosto ne’ebé ko’alia kona-ba Regime de Controlo de Circulação de Veículos, à Entrada e à Saída do Território Nacional.
“Katak ho lei ida ne’e, iha koordenasaun ida entre PNTL ho parte Alfándega no Diresaun Nasional Transporte Terrestre (DNTT) atu oinsá maka bele hala’o servisu hamutuk hodi kontribui taxa entrada karreta hosi nasaun Indonézia nian ba Estadu Timor-Leste,” esplika Adjuntu DTSRN Inocêncio liuhosi komunikadu imprensa ne’ebé Agêncía Tatoli asesu hosi Komandu PNTL.
Inspetór Xefe Inocêncio afirma tan, iha vizita ne’e nota katak fatin hirak ne’ebé maka tuir planu sei monta postu integradu sei iha faze preparasaun.
Tuir observasaun ekipa DTSRN katak to’o agora seidauk bele monta ka koloka membru PNTL parte Tránzitu iha postu refere tanba fatin hirak ne’e sei menus tebes hosi fasilidade servisu nian hanesan menus mobiliáriu no transporte .
“Tuir planu bainhira postu hirak ne’e iha ona kondisaun maka sei koloka membru PNTL parte Tránzitu na’in-lima (5) kada postu sira hanesan Salele, Bobimeto no Batugade, iha fatin refere maka sei haree mós parker ba karreta hodi hala’o prosedimentu legais nian hanesan taka stiker no selu taxa,” Inocêncio hateten.
Hafoin halo tiha vizita, ekipa DNTT sei halo mós relatóriu hodi aprezenta ba Komandu Jerál PNTL.
Jornalista : Eugénio Pereira
Editór : Francisco Simões
