DILI, 20 jullu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten iha prosesu pagamentu ba subsídiu $200, ekipa MSSI rejistu reklamasaun provizoriu hamutuk 14.000-resin iha munisípiu 12 inklui ho Rejiaun Administrativa Espesiál Oecusse Ambeno (RAEOA).
“Ita sei iha faze rekonsiliasaun ba dadus hotu-hotu hosi munisípiu 12 inklui ho RAEOA no dadus reklamsaun mós sei provizóriu hotu tanba seidauk verifika hotu. Bainhira rekonsiliasaun ramata ekipa sei halo verifikasaun ba dadus reklamsaun sira, maibé dadus reklamasaun provizóriu agora ne’e hamutuk 14.000-resin,” Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, haktuir ba Agência TATOLI, iha nia knaar fatin MSSI, Caicoli, Dili, segunda ne’e.
Diretór jerál ne’e hatutan, bainhira verifika hotu mak parte Ministériu Administrasaun Estatál (MAE) hamutuk ho MSSI halo verifikasaun ba reklamasaun hamutuk 14.000-resin ne’e, katak dadus ida-ne’e mak elizivél mak simu subsídiu $200 no ida ne’ebé mak la elizivél atu la simu .
Aleinde ne’e, nia informa, ekipa pagamentu MSSI finaliza prosesu pagamentu iha Rejiaun Administrativa Espesiál Oé-Cusse Ambeno (RAEOA) ho nia totál uma-kain ne’ebé simu ona pagamentu hamutuk 18.489 no totál osan ne’ebé selu ona hamutuk $3.697.800.
“Ita finaliza tiha ona ita-nia prosesu pagamentu subsídiu $200 ba benefisiáriu sira iha REAOA, iha tersa (14/07/2020) semana kotuk ho nia totál osan mak hamutuk $3.697.800 ne’ebé selu ona ba benefisiáriu hamutuk uma-kain 18.489,” nia dehan.
Jornalista : Osória Marques
Editór : Cancio Ximenes
