DILI, 21 jullu 2020 (TATOLI) — Parlamentu Nasionál (PN), iha segunda (20/07/2020) ne’e, aprova unanimidade Projetu-Lei númeru 1/V(1a)) Medida Prevensaun no Kombate Korrupsaun ho rezultadu votasaun a-favór 61, kontra 0, abstensaun 0 no deputadu na’in-haat auzénsia ka la marka prezensa.
“Ministériu Públiku mak na’in ba asaun penál tanba Konstituisaun, la’ós dehan CAC laiha nehan, agora CAC nia nehan kro’at liu ona tanba nia iha kompeténsia ida atu halo verifikasaun. Iha períodu verifikasaun dadus ne’e CAC bele hatene indísiu kriminál. Lei ne’e mós fó kompeténsia kooperasaun katak kuandu iha ona indísiu kriminál nia tenke koordena ho na’in ba investigasaun mak Ministériu Públiku”, Prezidente Komisaun A (Justisa no Konstitusionál), Deputadu Joaquim dos Santos, informa ba jornalista sira, iha resintu Parlamentu Nasionál, tersa ne’e.
Nia esplika, Ministériu Públiku bele delega kompeténsia ba CAC ka Ministériu Públiku hola inisiativa rasik prosesu bele la’o nafatin.
“CAC nia kompeténsia kona-ba prevensaun kriminál ne’e absoluta, agora atu halo investigasaun kriminál ne’e Ministériu Públiku nia kompeténsia tuir Konstituisaun. Sé CAC hakarak hala’o tenke koordena ho Ministériu Públiku hodi autoriza ka fó delegasaun kompeténsia”, Prezidente Komisaun A hateten.
Tuir Konstituisaun RDTL kapítulu II (Ministériu Públiku) artigu 132 (Knaar no estatutu) alínea 1 hateten, Ministériu-Públiku reprezenta Estadu, hala’o asaun penál, hametin defeza ba labarik sira, ema ne’ebé laiha, no inkapasitadu sira, defende legalidade demokrátiku no promove banati tuir lei.
Alínea 2 hosi artigu 132 ne’e dehan, Ministériu-Públiku nu’udar majistratura ida-ne’ebé hariik ho dala-dalas, ne’ebé iha Prokuradór-Jerál Repúblika nia okos.
Alínea 3 hosi artigu ne’e mós hateten, wainhira hala’o nia knaar, majistradu Ministériu-Públiku nian hakruuk ba ksukat legalidade, objetividade, izensaun, no obediénsia ba banati no orden ne’ebé hakerek nanis iha lei.
Entretantu alínea 4 hosi artigu 132 ne’e esplika, Ministériu-Públiku goza nia estatutu rasik, nune’e nia ajente sira labele hetan transférensia, suspensaun, apozentasaun eh demisaun bele de’it hetan wainhira hakerek nanis iha lei.
Notísia relevante:CAC Apresia Vontade Polítika PN Aprova Ona Lei MPCC
Jornalista : Evaristo Soares Martins
Editór : Rafy Belo
