DILI, 23 jullu 2020 (TATOLI) – Governu liuhosi Ministériu Petróleu no Minerál (MPM) deside nomeia Prezidente Autoridade Nasionál Petróleu no Minerál (ANPM) foun tanba atuál Prezidente, Gualdino do Carmo da Silva, nia mandatu ramata ona.
Ministru Petróleu no Minerál, Victor da Conceição Soares, informa nomeasaun ne’e sei akontese iha semana oin liuhosi deliberasaun Konsellu Ministru.
Ministru mós deklara katak iha ona figura ne’ebé mak atu troka Prezidente ANPM ne’e.
“Nomeasaun ne’e ha’u hanoin semana oin no iha ona ema atu troka, ema ne’e daudaun serbisu iha ANPM. profisionál barak loos iha ne’ebá ne’ebé lalika dúvida, semana oin sei rona rezultadu,” hateten Ministru Victor hafoin ramata enkontru ho Primeiru-Ministru, Taur Matan Ruak iha Palásiu Governu, kinta ne’e.
Tuir governante ne’e, ba kestaun ne’e Governu la ezonera atuál Prezidente ANPM tanba ninia mandatu ramata ona iha 30 juñu 2020 liubá, tanba ne’e presiza halo nomeasaun foun.
“Bolu ezonerasaun ne’e kuandu ema ne’e ein funsaun mak ezonera, maibé Prezidente ANPM atuál ne’e ninia mandatu hotu ona iha 30 juñu liubá, ne’ebé ita halo nomeasaun foun. Entaun nomeasaun ne’e normál no bele akontese tanba ema ida nia mandatu hotu ona tenke halo nomeasaun fali,” nia subliña.
Ba kestaun ne’e, Ministru seidauk bele anúnsia identidade kandidatu foun ne’e tanba sei iha prosesu.
“Ha’u lakohi temi uluk kandidatu nia naran tanba sei iha prosesu laran, kuandu lori mai Konsellu Ministru delibera ona maka ita sei hatene hotu no sempre hili ema ne’ebé di’ak liu, labele hili ida mai piór liu. Governu ida-ne’e atu halo sasán di’ak liu,” nia realsa.
Jornalista: Antónia Gusmão
Editora: Julia Chatarina
