DILI, 24 jullu 2020 (TATOLI)-Diretór Saúde Munisípiu Bobonaro, João Batista Mau Cardoso, hateten ekipa servisu kontinua implementa programa vijilánsia sentinela movel iha fronteira terrestre ba prevene pandemia globál surtu COVID-19.
Munisípiu Bobonaro fronteira terrestre direta ho Atambua Provinsia Nusa Tenggara Timur (NTT) Indonézia, tanba ne’e risku ba transmisaun moras coronavirus mai TL.
”Munisípiu Bobonaro ne’e ita hotu hatene besik liu ita-nia viziñu Indonézia tanba ne’e mak servisu vizilánsia sentinela kontinua la’o maka’as,” dehan Diretór Saúde Munisípiu Fronteira ne’e iha Otél Timor Dili, sesta ne’e.
Ekipa Vijilánsia ninia servisu ida maka koopera hamutuk ho Polisia Unidade Fronteira hodi kombate ema tama sai territóriu ho dalan ilegál.
“Pesoál saúde servisu hamutuk ho Unidade Polisia Fronteira kaptura sidadaun sira ne’ebé mak tama ilegál no lori ba iha kuarentena ne’ebé mak Governu prepara,” tenik tan.
Nia hateten durante ne’e ekipa vijilánsia sentinela halo servisu maka’as hodi foti ona amostra ba ema na’in 100-resin no submete ba Laboratóriu Nasionál para halo teste maibé rezultadu negativu.
“Kuarentena Batugade Munisípiu Bobonaro prienxe ona mobiliariu hanesan kama 70 ne’ebé apoiu husi Organizasaun Mundiál Saúde entaun agora daudaun ami prosesa hela kontratu ba kuarentena ho limpeza nian se ida ne’e prontu ona servisu kuarentena iha Batugade komesa funsiona,” nia esplika.
Jornalista : Felicidade Ximenes
Editór : Agapito dos Santos
