DILI, 24 jullu 2020 (TATOLI)-Eis Sekretáriu Estadu Komunikasaun Sosiál (SECOMS-sigla portugés) durante mandatu Governu konstitusionál daneen, Nelio Isaac Sarmento, hateten Agência TATOLI funda husi Estadu tanba ne’e tenki esforsu aan atu kompete mós ho Ajénsia Notisioza sira iha rai-liur.
“TATOLI tenke kompete ho Ajénsia sira iha nasaun liur lalika ba dook ba de’it iha CPLP nian, ba mós iha Ajénsia sira iha Azia nian. Entaun la’ós hanoin de’it ita atu prodúz notísia online de’it maibé tenke hanoin mós atu prodúz informasaun sira ne’ebé mídia seluk bele foti fali hosi TATOLI,”dehan nia ba TATOLI iha edifísiu FFTL, Bairru Formosa, sesta ne’e.
Iha Timor-Leste, daudaun ne’e iha televizaun rua maka kompete hanesan GMN TV no RTTL,ep, tanba ne’e TATOLI tenki dezenvolve aan liután para sai referensia ba mídia nasionál rua ne’e.
“Bainhira TATOLI dezenvolve di’ak sira mós tenke halo kontiudu iha brokestre notísia telivizaun nian obrigasaun ba telivizaun rua ne’e bele foti notisia ne’ebé iha TATOLI ho intensaun tenke halo kooperasaun institusional tenke lao no TATOLI tenke hanoin ona atu sai hanesan institute públiku ida ne’ebé la’ós de’it atu prodúz notísia maibé husi kontiudu notísia ne’e bele prodúz fali rendimentu, ida ne’e mak TATOLI tenke halo,”nia hatutan.
Eis Governante ne’e rekoiñese TATOLI iha ona evolusaun boot tanba durante ninia mandatu iha de’it jornalista inisiadór na’in hitu maibé agora instituisaun ne’e iha jornalista no funsionáriu 50-resin.
Tuir nia observasaun mós TATOLI nia mudansa boot tanba notísia iha ona versaun lian tolu hanesan tetum, portugés no inglés.
“Ho ida ne’e ha’u hakarak husu ba TATOLI liu-liu ba dirijente TATOLI no meus komunikasaun social governu atu fó flexibilidade ba TATOLI hanesan institutu públiku ida ne’ebé sobre sai hosi dependensia ba orsamentu hosi governu nian, dalan mak ne’e mellora rekursu umanus prodúz kontiudu hodi faan ba orgaun komunikasaun Sosiál Nasionál no Internasionál sira,” tenik tan.
TATOLI tenki sai nafatin fontes informasaun ida kredivel ba públiku iha Timor-Leste.
“Ha’u sempre dehan uluk ba TATOLI bainhira notísia jornalista sira husi mídia seluk seidauk hetan TATOLI tenke numeru ida, Numeru ida ne’e la’ós ema mak atu fó hatete ba ita maibé ita mak tenke iha matenek ne’ebé natoon hodi ke’e notísia sira husi polítika, ekonomia sosiál tenke numeru ida tanba ko’alia kona ba fasilidade TATOLI iha ona kondisaun . Maibé ha’u espera ba oin TATOLI bele hahú ho buat sira ha’u mensiona,” nia hateten.
Iha loron 27 fulan-jullu 2020, TATOLI sei kompleta ninia aniversariu ba dahaat hafoin ejiste iha loron 27 fulan-jullu 2016 liubá.
Jornalista : Hortencio Sanchez
Editór : Agapito dos Santos
