Polémika Ró Haksolok no uma MDG’s, CAC akompaña hodi apura ho loloos
DILI, 05 agostu 2020 (TATOLI)-Notísia krime ne’ebé informasaun espalla durante ne’e sai polémika iha públiku hanesan mega projetu konstrusaun portu Naval iha Hera, uma MDG’s, konstrusaun ponte CPLP, Ró Haksolok no sira seluk tan, vizilividade Komisaun Anti-Korrupsaun (CAC) nian kontinua akompaña hodi apura ho loloos.
Komisáriu Komisaun Anti-Korrupsaun (CAC), Sergio Hornai, informa, papél CAC nian mak sei atua hodi investiga ba kualkér utilizasaun finansiamentu orsamentu Estadu ne’ebé iha indísiu mosu irregularidade no mal gastu.
Sergio Hornai afirma, iha informasaun keixa, denunsia, delegasaun husi komunidade ho entidade relevante hato’o ba CAC no notísia krime ne’ebé espalla iha komunidade ne’ebé iha indikasaun indísiu ba kazu domíniu korrupsaun, CAC atentu tebes oinsá bele buka hatene ho loloos.
“Saida de’it mak atribui ka tuir misaun natureza komisaun CAC nian iha ámbitu ba iha utilizasaun orsamentu jerál Estadu ninian ba despeza rekorrente sira hanesan halo konstrusaun ba uma, akizisaun materiál, manutensaun mak iha nia irregularidade ka iha nia mal gastu ba utilizasaun la loos, CAC sei buka halo apuramentu tuir prosesu ne’ebé iha,” afirma Komisáriu CAC, Sergio Hornai, ba jornalista sira, ohin, iha Edifísiu CAC, Farol, Dili.
Nia hateten, CAC daudaun ne’e halo hela investigasaun hodi rekolla no halo analiza ba notísia krime hirak ne’e.
“Ita halo hela leitura ba iha dokumentu sira-ne’e, nune’e mós iha denunsia ka keixa sira ne’ebé iha prosesu investigasaun la’o hela hodi halo deskoberta seidauk bele foti konkluzaun ida katak loos ka la loos tanba nia iha perkursu hela hanesan komisáriu labele julga, maibé ba tribunál mak bele julga,” Sergio Hornai hateten.
CAC mós servisu hamutuk ho Ministériu Públiku (MP) nune’e halo validasaun notísia krime karik iha prosesu administrativu no poténsia kriminalidade hodi delega kompeténsia nune’e bele prosesa tuir lei ne’ebé iha.
Jornalista : Nelson de Sousa
Editór : Francisco Simões
