DILI, 10 agostu 2020 (TATOLI)-Komisaun ba preparasaun kongresu ordináriu Liga Futeból Amadora (LFA), daudaun ne’e simu ona lista kandidatura ema na’in ida ba kargu Prezidente Foun LFA nian ne’ebé aprezenta ona husi Klube Futeból hamutuk lima no fundadór LFA ema na’in haat.
Notísia Relevante :21 Marsu, Realiza Kongresu LFA
Koordenadór Jerál ba Kongresu LFA, Janio Tilman, hateten nia parte seidauk bele fó sai lista kandidatura ne’e ba públiku, maibé sei públika lista ne’e iha loron 14 fulan-agostu antes loron ida realiza kongresu ne’e iha loron 15/08.
Notísia Relevante :LFA Adia Kongresu iha Abríl
Tuir planu kongresu sei hala’o iha Suai Room Timor-Plaza Dili ho partisipasaun hamutuk ema 100-resin.
“Tuir rejimentu interna LFA ema ne’ebé iha direitu partisipa no fó votus iha kongresu mak klube ne’ebé antes ne’e hamahan aan iha LFA hamutuk 23,”informa nia ba jornalista sira durante konferénsia imprensa iha edifísiu LFA Bairru Formosa Dili, segunda ne’e.
Notísia Relevante :Agostu, LFA Realiza Kongresu
Kongresu ordináriu dahuluk ne’e ho objetivu atu hili estrutura foun tanba Prezidente LFA, Nilton Gusmão ninia mandatu ramata ona hafoin assume kargu ne’e durante tinan haat ona hahú 2015 to’o 2019.
Nia esplika kongresu ne’e sei gastu orsamentu hamutuk rihun $ 7-resin ne’ebé hetan apoia husi patrosinadór sira hanesan ETO, GOTA no Sekretáriu Estadu Juventude no Desportu (SEJD) no seluktan.
“Fundu maihosi patrosinadór sira para atu fasilita de’it kongresu, atu haree ba buat sira imprime ne’e, hahán hodi halo akompanamentu ba kongresu ne’e to ‘o hotu, osan ita iha rihun 7-resin hodi halo akompanamentu ba kongresu ida ne’e,” tenik Janio Tilman.
Notísia Relevante :Nilton Prefere Kandidatu Barak iha Kongresu LFA
Husi lideransa, Nilton Gusmão nian konsege realiza ona liga futeból Amadora (LFA) ba dahaat hahú husi 2016 to’o 2019 ne’ebé lao ho susesu to’o ohin loron.
“Kongresu ne’e halao ho karatér ordináriu para bele garantia prosesu eleisaun nune’e bele iha estrutura ne’ebé legal hodi kontinua servisu ne’ebé iha ona hodi dezenvolve futeból iha Timor-Leste,”
Governu liuhusi Sekretáriu Estadu Juventude no Desportu ho Federasaun Futeból Timor-Leste, no patrosinadór sira hanesan Heineken, Gota, ETO no seluk tan maka fó apoiu maka’as ba LFA.
Jornalista : Hortencio Sanchez
Editór : Agapito dos Santos
