DILI, 20 agostu 2020 (TATOLI)–Primeiru-Ministru (PM), Taur Matan Ruak, la marka prezensa iha selebrasaun aniversáriu Frente Armada Libertasaun Timor-Leste (FALINTIL) ba dala-45 tanba kondisaun saúde la estável.
Ministru Prezidénsia Konsellu Ministru, Fidelis Manuel Leite Magalhães, konfirma katak kondisaun Xefe Governu nian ladún estável tanba ne’e maka la partisipa.
“Primeiru-Ministru iha impedementu, sente moras oituan, tanba ne’e mak la mai, maibé membru Governu sira mai hotu hanesan Vise Primeiru-Ministru na’in rua mós iha, inklui membru Governu rua ne’ebé tau-matan ba kombatete libertasaun nasionál no ida fali tau matan ba defeza,” relata Ministru Fidelis, hafoin partisipa seremónia aniversáriu FALINTIL iha Kuartel Jenerál Fatuhada, kinta ne’e.
Governante ne’e dehan, membru VIII Governu maioria marka prezensa iha seremónia ne’e hodi fó parabéns no apresiasaun ba sakrifísiu luta nain sira hotu no kontribuisaun hotu ne’ebé asuwain FALINTIL halo durante tinan 24 nia-laran.
Jornalista: Antónia Gusmão
Editora: Julia Chatarina
