DILI, 21 agostu 2020 (TATOLI)-Tribunál Distritál Dili (TDD), liuhusi desizaun finál, ohin, aplika pena kumulativa no pena prizaun únika tinan 15 no tinan 27 ba arguidu na’in-ualu (8) ne’ebé envolve iha kazu omisídiu iha Aldeia Urema, Suku Leorema, Postu Administrativu Bazartete, Munisípiu Liquiça.
Notísia Relevante : Suspeitu Kazu Leorema Kumpre Prizaun Preventiva
Iha leitura akórdaun, Juiza Edite Palmira hateten, bazeia ba julgamentu liuhusi deklarasaun arguidu, lezadu, sasin, teste médiku, teste autópsia husi parte saúde iha faktu ne’ebé forte no provadu katak iha akontesimentu konfrontu entre membru grupu arte marsiál Kmanek Oan Rai Klaran (KORK) ho Persaudaran Setia Hati (PSHT) iha loron 4 jullu 2019.
Kazu omisídiu ne’e rezulta joven na’in-rua; Joni Gonçalves no Nilton Gonçalves, nu’udar maun no alin rasik, mate fatin tanba hetan sona husi arguidu sira, inklui vítima na’in-tolu seluk hetan kanek.
Kazu omisídiu agravadu no tentada ne’e envolve husi arguidu ho inisiál SDP, DC, JC, LC, DAVN, CM, ELM no JDC.
Notísia Relevante : Kazu Leorema, MP Husu Aplika Prizaun Preventiva Ba Suspeitu Na’in 11
Tribunál kondena arguidu sira ko ‘atór materiál ba krime omisídiu agravadu no krime tentada ne’ebé previstu iha artigu 139 iha kódigu penál Timor-Leste ho nia moldura penál pena prizaun tinan-12 to’o tinan-15.
Tuir entendimentu Tribunál nian ho krime omisídiu agravadu vítima na’in-rua mate ho pena parsiál ka akumulativu bainhira arguidu ida oho mate ema ida sei hetan pena prizaun tinan-15 soma hamutuk na’in-rua (2) ho pena tinan-30 no ema na’in -tolu kanek kada ema ida sei hetan pena tinan-lima (5) soma hamutuk tinan-15. Maibé Tribunál deside tetu desizaun hodi aplika redús ba pena parsiál hodi kondena arguidu ho inisiál SDP ho pena prizaun tinan-27, arguidu EC pena prizaun tinan-20, arguidu LC pena prizaun tinan-25, arguidu DAVN ho pena prizaun tinan -17, arguidu CM ho pena prizaun tinan -20 no arguidu ELM ho pena prizaun tinan-20.
Notísia Relevante : Kazu Leorema, TDD Hala’o Primeira Interrogatóriu Ba Suspeitu Nain 11
Ba arguida DC no arguidu JDC Tribunál aplika de’it pena únika prizaun tinan-15 tanba envolve de’it iha krime omisídiu agravadu.
Audiénsia julgamentu ne’e Ministériu Públiku reprezenta husi prokuradór Jacinto Babo, arguidu sira hetan asisténsia legál husi advogadu privadu Rui Mendonça no Ismael Assunção.
Notísia Relevante : Kazu Leorema, PNSIK Kaptura Tan Suspeitu Na’in Lima
Jornalista : Nelson de Sousa
Editór : Francisco Simões
