DILI, 26 agostu 2020 (TATOLI)- Komandu Polísia Nasionál Timor-Leste (PNTL) alerta ba membru organizasaun grupu arte marsiál (GAM); Persaudaraan Seti Hati Terate (PSHT) no Ikatan Keluarga Silat (IKS) Kera Sakti, atu hapara sira nia atividade provizóriu hodi halo viajen ilegál ba Atambua-Indonézia hodi sa’e sabuk ka pengesahan.
Notísia Relevante : UPF ho F-FDTL kaptura negosiante balun iha fronteira terrestre
Komandante Jerál PNTL Komisáriu Faustino da Costa dehan, daudaun ne’e Timor-Leste implementa hela Estadu Emerjénsia hodi halo seguransa maka’as iha área fronteira terrestre no tasi, hodi evita sidadaun sira halo movimentu ilegál ba mai.
Faustino da Costa dehan, risku boot tebes, bainhira membru arte marsiál sira ne’e halo viajen ilegál ba sa’e sabuk, maibé sira la hatene katak, moras COVID-19 agora afeta maka’as iha Indonézia no nasaun seluk fó ameasa mós ba estabilidade seguransa no saúde povu Timor-Leste.
“Problema seluk tan maka, grupu organizasaun arte marsiál sira iha Timor-Leste halo vizita ba Indonézia hodi halo pengesehan ka sa’e sabuk. Ida ne’e perigu tebes, tanba ita la hatene sira mak moras ne’e kona fila fali mai Timor-Leste fó ameasa mós ba família ita hotu iha Timor-Leste,” dehan Komisáriu Faustino da Costa, iha ámbitu semináriu partilla informasaun seguransa atu servisu hamutuk salva povu no halo prevensaun ba ameasa surtu COVID-19 iha área fronteira terrestre, portu no aeroportu ne’ebé envolve Polisia Indonézia, Austrália no reprezentante instituisaun estadu iha Centro Formasaun Polísia, Comoro, Dili.
Nia dehan, kada tinan iha fulan agostu no setembru, nu’udar fulan ida ne’ebé importante tebes ba membru GAM sira atu halo viajen ilegál maka’as tama ba Indonézia hodi sa’e sabuk.
Atu evita ema halo viajen ilegál ne’e, PNTL no F-FDTL halo patrullamentu konjunta iha liña fronteira para asegura seguransa metin.
“Prosesu sa’e sabuk halo iha Timor Osidentál too Surabaya, tanba ema barak sei halo maneira oin-oin hodi tama ilegál, maibé UPF no F-FDTL no komandu polísia munisípiu sempre halo kapturasaun hodi kaer sidadaun sira ne’e,” nia hateten.
Nia hatutan, populasaun sira ne’ebé hela iha liña fronteira terrestre ne’ebé halo atividade negósiu ilegál mós parte UPF no F-FDTL kontinua kaptura no prosesa tuir lei.
Komisáriu Faustino hatutan, PNTL rasik simu informasaun Timor-oan barak ne’ebé eskola iha Indonézia no traballadór Timor-oan sira ne’ebé servisu iha Koreia, Austrália no Inglaterra barak hakarak fila, maibé tanba fronteira sei taka metin, ema hirak ne’e balun mai sei hela iha Indonézia, Kupang no Atambua.
Koloka membru UPE-UPM reforsa seguransa
Iha parte seluk, Komisáriu Faustino da Costa, dehan nia parte hatún ona orientasaun ba Komandu Unidade Polísia Marítima (UPM) hodi uza Ró Kay Rala Xanana hodi halo operasaun iha fronteira tasi entre Timor-Leste no Indonézia.
Alende ne’e, Komandu koloka mós membru Unidade Rezerva Polísia (URP) hodi ba reforsa servisu operasaun UPF iha liña fronteira Terrestre Maliana ba too Covalima.
Komandu PNTL daudaun ne’e servisu ho parseiru TLPD hodi buka apoiu lojístika no fasilidade saúde hodi apoiu servisu ne’e.
Komisáriu Faustino da Costa, rekoñese PNTL hasoru hela dezafiu, maibé importante liu membru sira halo seguransa metin liután.
Jornalista : Eugénio Pereira
Editór : Francisco Simões
