DILI, 08 setembru 2020 (TATOLI) – Prezidente Repúblika, Francisco Guterres “Lú Olo” fó indultu no komutasaun pena ba dadur na’in-rua.
Notísia Relevante : MJ haruka lista dadur na’in-180-resin ba PR atu hetan indultu
Iha fulan hirak liu ba Ministériu Justisa (MJ) haruka ona lista naran dadur hamutuk na’in-180-resin ba Xefe Estadu atu bele fó indultu no komutasaun pena iha selebrasaun loron konsulta popular iha loron 30 agostu, tinan ne’e.
Tuir lei númeru 5/2016 artigu 7 alínea d, Ministru Justisa hato’o de’it prosesu pedidu indultu bele mai husi dadur, família, advogadu no Defensor ka kestaun ho kondisaun moras no kompeténsia atu deside husi Prezidente Repúblika mak bele fó.
“Prezidente Repúblika deside ona ema na’in-rua; ida fó indultu hodi sai husi prizaun no ida seluk hatún nia pena tinan-rua,” informa Ministru Justisa, Manuel Cárceres da Costa, ba Agência Tatoli iha Palaçio do Governo, segunda (07/09)
Nia hateten, lista naran sira seluk PR seida’uk pronunsia sai no parte Governu hatama rekerimentu de’it no direitu prerogativu Prezidente Repúblika (PR) nian kompeténsia tuir konstituisaun atu deside ka la’e ne’e kompeténsia PR nian.
Jornalista : Nelson de Sousa
Editór : Francisco Simões
