PGR hein PN bele aprova lei rekuperasaun ativu
DILI, 19 outubru 2020 (TATOLI)-Prokuradór Jerál Repúblika (PGR), José Ximenes, hateten, bainhira Parlamentu Nasionál (PN) aprova ona lei rekuperasaun ativu sei administra sasán ne’ebé prende no sei rekolla reseita ho di’ak liután ba Estadu.
José Ximenes hateten, projetu lei refere MP entrega ona ba Governu no Parlamentu Nasionál (PN), liuhosi komisaun A ne’ebé trata asuntu Justisa no Konstitusionál atu haree fila-fali tanba antes ne’e kaduka tiha iha PN.
Nia fó ezemplu sasán hanesan mina-rai ema ne’ebé hala’o atividade ho dalan illegal ikus mai autoridade relevante prende rai kleur, entaun presiza iha lei ida ne’ebé proteje bens aprendidu sira.
“Iha 2015 no 2016 ami prepara projetu ida kona-ba lei rekuperasaun ativu, lei ne’e atu administra bens sira ne’ebé prende,” Prokuradór Jerál Repúblika (PGR), José Ximenes, hateten ba jornalista sira, ohin, iha Palaçio Prezidensiál, Dili.
Nia espera, bainhira lei ne’e hetan ona aprovasaun sei jere di’ak liu ba sasán sira ne’ebé prende, se la’e, prende tiha rai tinan barak nia laran husik de’it.
José Ximenes informa, MP ho Diresaun Jerál Patrimóniu Estadu iha fulan kotuk haree ona motorizada 151 ne’ebé halo apreensaun tanba laiha dokumentu iha tinan haat ka tolu liubá atu halo prosesu leilaun, tanba Tribunál deside ona sasán sira-ne’e afavór ba Estadu. Nune’e mós, daudaun PGR hamutuk ho PNTL promove ba tiha ona Tribunál Distritál Dili (TDD) no Tribunál deside motorizada 35 sei iha faze hodi afavór ba Estadu.
Iha mós ai, kontentór lima, sasán kuantidade boot ho materiál sira seluk ne’ebé daudaun rai hela iha Eskuadra Polísia, Caicoli, Dili.
Jornalista : Nelson de Sousa
Editór : Francisco Simões
