DILI, 22 outubru 2020 (TATOLI)–Jestór kmanek supermerkadu, Julião dos Santos, informa relasiona ho situasaun COVID-19 ne’ebé akontese kuaze iha mundu tomak inklui Timor-Leste dadaun ne’e, afeta ba rendimentu kompañia no parte supermerkadu deside hapara traballadór balun.
“Situasaun ne’e afeta ba traballadór no kompañia mós laiha rendimentu, entaun hapara ona traballadór na’in-47 no agora ami hela 15 de’it ona,” Jestór supermerkadu ne’e relata ba Agência TATOLI, iha Timor Plaza, kinta ne’e.
Antes ne’e, traballadór iha supermerkadu ne’e hamutuk 50-resin, maibé tanba situasaun atuál traballadór sira lakon serbisu.
Tuir Julião dos Santos, rendimentu antes krize globál ne’e akontese, loron ida supermerkadu ne’e bele hetan loron ida $7.000 to’o $8.000, maibé daudaun loron ida másimu maka $1.000.
Enkuantu, saláriu ba traballadór iha kmanek bainhira situasaun sei normál, traballadór bain-bain bele hetan $200 resin no supervizór $310.
“Maibé agora ami hotu simu fali kontratu foun no hetan de’it saláriu standart $150,” nia akresenta.
Tanba ne’e, nia husu ba parte Governu atu halo intervensaun, nune’e bele normaliza hikas atividade ekonómika no supermerkadu bele iha forsa halo atividade.
“Ha’u-nia hakarak Estadu bele koordena ho na’in ba kompañia atu ajuda no fó forsa ba entidade ekonómika ne’e hodi bele deside aumenta sasán, tanba agora ami labele la’o no situasaun ne’e grave loos. Ami hein de’it hosi na’in ba loja iha loron tuir mai, bainhira deside atu taka entaun ami sei lakon serbisu hotu,” nia dehan.
Jornalista: Natalino Costa
Editora: Julia Chatarina
