DILI, 23 outubru 2020 (TATOLI)—Ministru Petróleu no Minerál (MPM), Víctor da Conceição Soares, lansa relatóriu loron-100 serbisu, hafoin asume kargu nu’udar membru Governu iha loron 24 juñu 2020.
Ministru Víctor hateten iha fulan-tolu nia laran konsege atinje objetivu importante tolu hanesan restruturasaun iha parte ministériu no órgaun tutela, define polítika ba Timor Gás no Petróleu, Empreza Públika (Timor GAP, E.P) atu partisipa iha negósiu, no kria kondisaun ba empreza estatál ne’e partisipa iha fornesimentu kombustível iha sentrál elétrika Hera no Betano.
“Iha loron-100 nia laran, ba dahuluk halo mudansa hahú restruturasaun hosi ministériu ne’ebé durante ne’e laiha Diretór Jerál, Gabinete Jurídiku no Inspetór Jerál. Portanto hahú hosi ne’ebá mai to’o instituisaun tutela, bazeia ba orientasaun polítika hakarak iha aliñamentu polítiku, entaun ba dahuluk tenke iha mudansa ba jestór sira,” governante ne’e dehan iha ámbitu lansamentu relatóriu iha sala enkontru Timor GAP, Timor Plaza, sesta ne’e.
Notísia Relevante: PM apresia kapasidade líder foun ANPM, Timor GAP no IPG
Reuniaun KM: deside Timor GAP fornese kombustível ba EDTL
Restruturasaun akontese ba órgaun tutela hanesan Timor GAP, Autoridade Nasionál Petróleu no Minerál (ANPM), no Institutu Petróleu no Jeologia (IPG, sigla portugés).
“Hafoin halo restrutura ba prezidente sira, serbisu bele la’o aliñanadu, entaun sira rasik maka tenke halo sira nia parte no ha’u la to’o iha ne’ebá maibé durante ne’e buat hotu la’o di’ak,” nia akresenta.
Serbisu seluk ne’ebé konsege atinje maka halo polítika atu Timor GAP partisipa iha negósiu hodi bele hetan reseita rasik.
“Durante ne’e empreza estatál la hatama reseita, entaun ita halo polítika atu empreza estatál tenke envolve iha negósiu komersializasaun atubele fó retornu ba Estadu. Ne’e maka autoriza sira atubele fornese konbustível, la’ós iha Suai de’it maibé tenke iha territóriu tomak,” nia hatutan.
Serbisu ikus ne’ebé MPM konsege atinje maka halo dekretu lei atu Timor GAP partisipa iha fornesimentu ba Eletricidade de Timor-Leste (EDTL), ne’ebé diploma ne’e rasik halo ona diskusaun iha nível Konsellu Ministru no hetan ona aprovasaun, agora hein promulgasaun.
Iha biban ne’e, Ministru subliña, VIII Governu hakarak promove governasaun di’ak no transparánsia, ne’ebé atividade saida de’it públiku presiza akompaña.
2021, MPM hakarak foku hasa’e rendimentu fundu petrolíferu
Hafoin konklui revista loron-100 serbisu, tinan oin MPM hakarak foku ba gráfiku fundu petrolíferu.
“Fundu petrolíferu tun presiza atensaun boot atu Governu prepara halo perfurasaun ba posu petrolífera ne’ebé komprometidu atu halo, nune’e bele iha rezultadu produsaun no hasa’e reseita fundu,” nia akresenta.
Aleinde ne’e, Lei Kódigu Mineiru ne’ebé aprovadu ona, iha faze tuir mai presiza halo dezenvolvimentu no komersializasaun atu utiliza iha rai-laran no halo esportasaun.
“Minerál ninian retornu sei sustentavél liu ba longu prazu, tanba ne’e Governu sei iha planu di’ak ba 2021,” nia fó hanoin.
Daudaun Governu akompaña hela empreza petrolífera ne’ebé sei halo perfurasaun ba mina matan ne’ebé define ona.
“Empreza sira ne’ebé sei halo perfurasaun maka Santos, Timor GAP ho ninia parseiru iha rai laran hanesan Timor Resources ne’ebé preparadu ona,” Ministru ne’e informa.
Seremónia lansamentu relatóriu revista ne’e hetan partisipasaun másimu hosi prezidente órgaun tutela MPM, dirijente no entidade relevante inklui funsionáriu sira.
Jornalista: Natalino Costa
Editora: Julia Chatarina
