Bolseiru Timoroan na’in-14 sei hala’o estudu mestradu iha Japaun
DILI, 24 outubru 2020 (TATOLI)-Governu Japaun liuhosi sira-nia embaixada iha Dili kontinua hatudu sira-nia prontidaun hodi fó apoiu mai Timor-Leste nia dezenvolvimentu rekursu umanu.
Iha sesta kalan (23/10), Embaixadór Japaun, Masami Kinefuchi, ofisiálmente hala’o serimónia despedida ho bolseiru timoroan na’in-14 ne’ebé sei dezloka ba hala’o estudu mestradu iha Japaun.
Governu Japaun iha programa bolsu estudu haat hanesan, Japaun Development Scholarship (JDS), Sustainable Development Goals (SDGS) Global Leader Program, STI-Science, Technology and Innovation no Jica Long-term training.
Bolseiru sira ne’ebé selesionadu ba programa bolsu estudu ne’e maioria funsionáriu mai hosi instituisaun sira hanesan Institutu Petróleu Jeolojia (IPG), Timor Gap, Ministériu Finansas, Ministériu Turizmu Komérsiu Indústria, Universidade Nasionál Timor Lorosa’e (UNTL), Ministériu Justisa, Ministériu Edukasaun no Ministériu Interior.
Masami Kinefuchi, hateten, bolseiru sira-ne’e sei ba hala’o sira nia estudu iha universidade lubuk ne’ebé koloka ona durante tinan-rua ho sira-nia area espesializasaun hanesan iha area tékniku mina nian, administrasaun públika, siénsia sosiál, siénsia polítika no sira seluk tan.
“Area espesializada ne’e depende ba area ne’ebé sira servisu ba hanesan daudaun iha ministériu sira,” Embaixadór Masami Kinefuchi hateten.
Nia hatutan, ho programa bolsu estudu ne’e bele fasilita funsionáriu sira oinsá hadi’a di’ak liután servisu iha ida-idak nia area.
Diplomata ne’e informa, ho situasaun COVID-19 ne’ebé daudaun la’o hela, sira-nia parte sei esforsu hodi bele fasilita vou (aviaun) nune’e bele halo ona dezlokasaun. Maibé iha ona konfirmasaun katak bolseiru ida mak sei hahú dezloka iha loron 28 outubru, tinan ne’e.
Biban ne’e Komisáriu Komisaun Funsaun Públika (CFP) ba asuntu Formasaun no Dezenvolvimentu, Antonio Freitas, husu atu aproveita tempu ho didi’ak mantén disiplina durante estudu.
Ligia Rozita Vieira, nu’udar bolseira orgullu tebes bele hetan oportunidade ida-ne’e no promete sei utiliza ho di’ak, tanba nia espera hamutuk maluk sira seluk sei atinje tuir objetivu ne’ebé iha hodi kompleta iha area ida-idak nian, nune’e bele fila mai Timor-Leste kontribui ba dezenvolvimentu nasaun nian.
Serimónia despedida ne’e partisipa mós hosi membru Parlamentu Nasionál, Diretora Fundu Dezenvolvimentu Kapitál Umanu (FDCH), Leila Cárceres, dirijente Institutu Nasionál ba Administrasaun Públika (INAP) no konvidadu sira seluk.
Jornalista : Nelson de Sousa
Editór : Francisco Simões
