iklan

NASIONÁL, JUSTISA, HEADLINE

Kazu Raikotu, PN-Rede Feto sujere tribunál aplika pena todan

Kazu Raikotu, PN-Rede Feto sujere tribunál aplika pena todan

Plenária Parlamentu Nasionál. Imajen Tatoli/António Gonçalves

DILI, 05 outubru 2020 (TATOLI)—Reprezentante povu iha uma fukun Parlamentu Nasionál no Rede Feto Timor-Leste, husu tribunál aplika pena todan ba autór ne’ebé komete krime omisídiu iha Raikotu, Dili.

Notisia Relebante: Ministru Cárceres kondena maka’as kazu asasinatu Raikotu

Krime omisídiu ne’e akontese iha Aldeia Terra Santa, Raikotu, Suku Madohi, Postu Administrativu Dom Aleixo, rezulta Domingas Soares mate fatin no nia-oan feto LM hetan kanek.

Prezidente Grupu Feto Parlamentár Timor-Leste (GMPTL-sigla portugés), Deputada Lídia Norberta dos Santos Martins, hateten inan-feton Domingas Soares mate tanba defende oan feto nia dignidade.

Líder GMPTL ne’e lamenta no kondena hahalok aat ne’ebé komete hosi autór hasoru feto ho ninia inan ne’ebé hakotu iis.

“Ami hanesan feto sente triste ho hahalok aat ne’e. Tanba ne’e, ami husu ba autoridade kompetente, favór rona halerik komunidade tomak nian kona-ba kazu ne’e. Hahalok hanesan ne’e la hatudu morál hanesan ema timoroan. Se ita hakarak hapara aktu ida-ne’e entaun tenke aplika pena todan ba autór,” Prezidente GMPTL ne’e ko’alia iha resintu Parlamentu Nasionál, kinta ne’e.

Entretantu, Vise-Prezidente Parlamentu Nasionál, Deputada Maria Angelina Sarmento , lamenta ho krime omisídiu ne’e.

Deputada PLP ne’e haktuir,  iha tinan 20-resin Timor-Leste hanesan nasaun ida ne’ebé livre no independente hodi ko’alia kona-ba dame maibé labele ko’alia de’it iha nível estadu no nivel nasaun, maibé dame hahú hosi ema ida, familia ida, uma-kain ida ba sosiedade hafoin ba nasaun.

“Ho desizaun Tribunál hodi fó sentensa ne’ebé todan ba autór, tanba  ne’e sai lisaun boot ida ba ema hotu, no mós ba ema seluk ne’ebé mak iha intensaun hakarak halo abuzu seksuál no hakarak halo krime omesídiu,” Vise-Prezidente Parlamentu Nasionál informa ba jornalista sira,  iha otél Novo Turizmu.

Deputada Maria Angelina Lopes Sarmento, hein tribunál bele foti desizaun ida-ne’ebé justa ba vítima no família vítima.

Nia informa, kazu ida-ne’e sai ona presedente ba sira seluk atu labele komete tán hodi respeita ema nia valór no dignidade umanu  mak importante liu.

“Ne’ebé, ba sé de’it mak komete krime ne’e tribunál tenke aplika  pena ida ké todan ba autór atu sai efek cerah. Tanba krime no violénsia ne’e labele sai hanesan kultura no abitu iha ita-nia sosiedade. Tanba ida sai hanesan lisaun ne’ebé aat no ladi’ak ita tenke husik hahú husi ita-nia uma laran rasik,” nia informa.

Prezidente Konsellu Rede Feto Timor-Leste, Yasinta Lujina. Imajen TATOLI/Evaristo Soares Martins.

Entretantu, Prezidente Konsellu Rede Feto Timor-Leste, Yasinta Lujina husu ba autoridade kompetente atu konsidera kazu ne’e sériu nune’e ba futuru labele akontese tán.

“Ami ejize justisa ne’ebé justa ba inan-feton matebian no mós ba alin ne’e, ami-nia pozisaun sei fó asisténsia ba alin ne’e, ne’ebé sai hanesan sasin prinsipál kazu ne’e, liuliu ita apoia psiko-sosiál hodi halakon nia trauma. Ami husu aplika pena ne’ebé todan ba autór,” nia dehan.

Prezidente Konsellu Rede Feto Timor-Leste ne’e promete sei sei halo monitorizasaun ba prosesu kazu refere.

Notisia Relevante: Prezidente Repúblika la simu kazu krime Raikotu

Jornalista: Evaristo Soares Martins

Editór: Cancio Ximenes

iklan
iklan

Leave a Reply

iklan
error: Content is protected !!