DILI, 07 novembru 2020 (TATOLI) –Torneiu futeból 12 novembru, ne’ebé realiza iha kampu Alor, sábadu ne’e, entre klube uma na’in FC K-JKAL vs Os Verde termina ho rezultadu 0-0.
Notísia Relevante : K-JKAL organiza torneiu futeból Kopa 12 novembru
Durante jogu ne’e la’o, jogadór sira hosi klube rua hatudu jogu ho espíritu “fair play”, mezmu nakonu ho “tensaun” atake kontra atake, maibé jogu la’o ho onestu no parte-rua prontu simu lakon no manan.
Iha jogu primeiru parte to’o árbitru huu apitu naruk iha minutu 45, maibé jogador hosi klube rua-ne’e la konsege marka golu iha baliza, mezmu dala barak hatudu presaun iha liña guarda-rede nian, maibé nafatin hanesan presaun de’it.
Kontinua ba segunda parte, treinadór Os Verde, Hermenegildo muda formatu jogu hosi jogu primeiru parte nian ho jogu tiki-taka ala samba Brazil, muda ba jogu bola altu atu bele fó vantajen jogadór sira Os Verde ne’ebé mesak ho postura altura atu prodús golu, maibé baliza no jogadór K-JKAL la fó oportunidade atu Os Verde hatama golu ka lees guarda-rede K-JKAL nian.
Jogu la’o ona iha minutu 76 treinadór Aalino hosi K-JKAL foti inisiativa hodi orienta nia jogadór sira halo presaun kontra atake. Maibé tatika sira-ne’e la rezulta golu to’o de’it minutu ikus termina jogu segunda parte nian. Ho nune’e, klube rua-ne’e tenke simu rezultadu hanesan 0-0.
Jornalista : Tomé Amado
Editór : Francisco Simões
