DILI, 11 novembru 2020 (TATOLI)-Iha proposta Orsamentu Jerál Estadu (OJE) tinan fiskál 2021, Polísia Sientífika Investigasaun Kriminál (PCIC) prevee $2,035,164 hodi implementa nesesidade no programa ne’ebé trasa ona.
Papél PCIC nian koazuva autoridade judisiária, dezenvolve no promove asaun prevensaun, detensaun no investigasaun kompeténsia ka kometida hosi autoridade judisiária kompetente, hanesan asegura sentralizasaun nasionál informasaun kriminál no respetiva koordenasaun operasionál ho kooperasaun polisiál internasionál (artigu 3º dekretu-lei nº 15/2014, 14 maiu).
Proposta OJE 2021 ba PCIC ho montante $2,035,164 koloka ba saláriu vensimentu $1,144,180, bens servisu $426,284, kapitál minor $464,700, kapitál dezenvolvimentu ho transferénsia públika laiha (-).
Tuir dokumentu livru Planu Asaun Nasionál medida prinsipál setoriál hosi PCIC ba tinan fiskál 2021 mak promove asesu justisa, kontinua asegura servisu prevensaun, detensaun, investigasaun kriminál ba krime grave, krime organizadu ka kompleksu, ho reforsu kooperasaun no koordenasaun nasionál ho internasionál, akizisaun ekipamentu báziku ba servisu laboratorial iha ámbitu rekolla prova material/teste DNA, imprensa dijitál no seluk tan ho prova pesoál.
PCIC mós kontinua promove formasaun, hanesan formasaun espesializada ba investigadór no espesialista ba laboratóriu iha polísia sientífika, promove boa governasaun no jestaun institusionál, fortalese kapasidade rekursu umanu.
Alokasaun orsamentál ne’ebé PCIC prevee kada programa kona-ba implementasaun asesu ba justisa sei gasta $1,596,351, programa boa governasaun no jestaun institusionál sei gasta $438,813.
Ministru Justisa ,Manuel Cárceres da Costa, akompaña hosi Diretór Nasionál PCIC, Vicente Fernandes e Brito, ohin, aprezenta proposta OJE 2021 PCIC nian liuhosi audiénsia públika ho komisaun A trata asuntu justisa no konstitusionál iha Parlamentu Nasionál.
Jornalista : Nelson de Sousa
Editór : Francisco Simões
