DILI, 11 novembru 2020 (TATOLI) —Prezidente Repúblika, Francisco Guterres “Lú Olo” hato’o agradese ba reprezentante Fundu Nasoins Unida ba Labarik (UNICEF, sigla Inglés) mai Timor-Leste, Valérie Taton ne’ebé hatudu prestasaun servisu di’ak durante tinan-tolu hala’o lidera misaun UNICEF iha Timor-Leste.
Notísia Relevante : UNICEF fó apresiasaun ba Governu Timor-Leste
Xefe Estadu hato’o kestaun ne’e bainhira hala’o audiénsia despedida ho reprezentante UNICEF mai Timor-Leste, Valérie Taton iha Palásiu Prezidensiál, Dili, ohin.
Xefe Estadu dehan, Estadu Timor-Leste sei kontinua servisu hamutuk ho UNICEF hodi implementa programa sira iha Timor-Leste.
Iha fatin hanesan, reprezentante UNICEF ba Timor-Leste, Valérie hateten, durante enkontru ne’e nia aproveita tempu hodi hato’o agradese ba Xefe Estadu Lú Olo kona-ba servisu ne’ebé nia halo hodi lori UNICEF hametin kooperasaun servisu.
“Ha’u mai kumprimenta Prezidente Repúblika, Francisco Guterres Lú Olo hodi hato’o mós ha’u nia relatóriu durante hala’o misaun tinan tolu iha Timor-Leste,” dehan ba jornalista iha Palásiu Prezidensiál, Dili.
Nia haktuir, “UNICEF implementa ona programa oin-oin iha área edukasaun, saúde no hadi’a problema nutrisaun no haree problema ba labarik sira iha Timor-Leste no iha programa barak maka ami konsege implementa hetan rezultadu di’ak hanesan ezemplu ida maka programa saneamentu ho ijiene ne’ebé UNICEF apoia governu haree ba área la soe fo’er boot arbiru hodi fó edukasaun ba sosiedade atu ajuda governu no ita tomak livre moras oin-oin.”
Nia hato’o agradese, tanba durante aprezenta progresu servisu ne’e, hetan reasaun di’ak hosi PR Lú Olo hodi husu UNICEF kontinua investe maka’as nafatin iha área edukasaun no hadi’a problema nutrisaun no saúde labarik sira iha Timor-Leste no dezenvolve direitu ba labarik sira iha Timor-Leste.
Valérie hahú servisu iha Timor-Leste iha agostu 2017 to’o misaun remata sei ba hala’o fila fali misaun foun iha Senegal, Afrika.
Jornalista : Eugénio Pereira
Editór : Francisco Simões
