DILI, 12 Novembru 2020 (TATOLI)—Komandu Polísia Munisípiu Dili, ohin, detein juventude na’in-rua hosi Grupu Movimentu Defende Konstituisaun ne’ebé fahe broxura kontra Prezidente Repúblika, Francisco Guterres Lú Olo, durante serimónia marsa hosi Igreja Motáel ba Semitériu Santa Cruz, Dili.
Segundu Komandante Polísia Munisípiu Dili, Superíntendente Euclides Belo, hateten juventude na’in-rua ne’e polísia kaer tanba fahe mós broxura balu iha área estrada Rotunda Estátua Proklamadór Independénsia, Francisco Xavier do Amaral nian, bainhira sira halo hela atividade ilegál fahe broxura ho tema “Maluk Timoroan, Hader! Mai Ita Defende Konstituisaun, Ita Nia Lei Inan!” ho nia konteudu kontra hasoru PR Lú Olo.
“Komandu indentifika iha joven no grupu iha marsa ne’e sira fahe broxura hasoru Xefe Estadu Francisco Guterres Lú Olo. Tanba ne’e ami prende ona broxura lubuk ida inklui feto-ida mane-ida ne’ebé submete hela ba investigasaun iha Polísia Vera Cruz, Dili,” Superíntendente Euclides Belo hato’o ba jornalista sira iha Semitériu Santa Crus, Dili, kinta ne’e.
Euclides hatutan, PNTL seidauk bele fó sai identidade pesoál feto-ida no mane-ida ne’ebé fahe broxura ne’e, tanba sei halo investigasaun hodi buka tuir responsavel sira-ne’ebé hakerak broxura kontra PR Lú Olo sei halo investigasaun hotu.
“Ita sei halo identifikasaun tanba ita konsidera asaun protesta iha broxura ne’e bele konsidera la iha legalidade no laiha koñesimentu ba PNTL,” nia hateten.
Eculides hatutan, iha broxura ne’e mensiona Prezidente Repúblika Francisco Guterres Lú Olo nia naran kona-ba situasaun polítika iha rai laran no grupu hirak ne’e konsege fahe ona ba komunidade sira iha estrada ibun no grupu sira-ne’ebé partisipa iha Marsa 12 Novembru ne’e.
Entretantu, tuir observasaun Agência Tatoli nota durante selebrasaun Masakre Santa Kruz ne’e, Prezidente Repúblika, Francisco Guterres Lú Olo, ho nia espoza no membru Governu no korpu diplomatiku sira hetan seguransa makaas hosi parte Polísia Munisípiu Dili, Batallaun Orden Públiku, Polísia Militár no Juventude Masakre 12 Novembru sira.
Jornalista: Eugénio Pereira
Editór: Cancio Ximenes
