iklan

COVID-19, HEADLINE, SAÚDE

Timor-Leste livre hikas hosi COVID-19

Timor-Leste livre hikas hosi COVID-19

Diretora Jeral Prestasaun Saude Ministeriu Saude, Odete Viegas da Silva. Imajen Tatoli/Antonio Goncalves

DILI, 14 novembru 2020 (TATOLI)–Koordenadora Jéral COVID-19 Ministériu Saúde, Odete da Silva Viegas hateten, ohin, Governu liuhosi Ministériu Saúde anúnsia Timor-Leste livre hikas hosi COVID-19 tanba Ministériu Saúde fó livre ona pasiente COVID-19 ne`ebé izola iha fatin izolamentu Sentru Saúde Vera Cruz, Dili.

Rezultadu teste dala rua tutuir malu hatudu rezultadu negativu ka rekuperadu ona hosi moras COVID-19.

Notisia Relevante: MS izola tan indonéziu ida tanba konfirmadu COVID-19

“Ita-nia moras ida-ne`ebé mak pozitivu tama iha kuarentena iha loron 16 fulan outubru, ohin, ita sei fó alta. Nia rezultadu dala rua, durante nia baixa iha fatin izolamentu Vera Cruz hatudu negativu dala rua iha loron 11 no 13. Purtantu, hafoin konferénsia imprensa ita sei fó alta sidadaun mane ne`e ho idade 59, nia kondisaun estável,” Odete Viegas informa ba jornalista sira durante konferénsia imprensa ne’ebé hala’o iha Palácio das Sinzas, Caicoli, Dili, sábadu ne’e.

Odete haklaken, felizmente Timor-Leste laiha ona kazu foun ba moras COVID-19. Entretantu, tuir dadus komulativu hahú hosi loron 06 fulan-marsu tinan 2020 to`o loron 13 novembru 2020, totál númeru teste laboratóriu to`o loron 13 fulan-novembru hamutuk 12.248, hein rezultadu 387, totál kumulativu kazu 30, rekuperadu hamutuk 33, konta hamutuk ho ema na`in haat (4) provável.

“Númeru ba kuarentena hamutuk na’in-222. Iha Dili na’in-179 no munisípiu hamutuk na’in-43. Auto-kuarentena totál hamutuk na’in-267, iha Dili na’in-266 no munisípiu ema na`in ida (1),” nia dehan.

Nia informa, okupante kuarentena no auto-kuarentena ne`ebé pasa ona loron 14 hamutuk na’in-6.017. Okupante kuarentena iha Dili na’in-4.966 no iha munisípiu hamutuk na’in-1.051. 

“Maski agora Timor-Leste laiha ona kazu foun ba iha COVID-19 maibé ha’u apela ba populasaun katak surtu COVID-19 ne`ebé to`o ohin loron sei sai nafatin preokupasaun mundiál no fó ameasa ba saúde públiku. Ministériu Saúde liuhosi Komisaun Nasional COVID-19 hakarak apela ba populasaun tomak, husu ba komunidade atu nafatin mantein kalma no sempre nafatin halo medida preventiva ba COVID-19 hanesan fase liman beibeik, uza máskara no mantein distánsia sosiál.

Jornalista: Nelia Fernandes

Editór: Cancio Ximenes

iklan
iklan

Leave a Reply

iklan
error: Content is protected !!