Timoroan oan servisu iha rai-liur kontribui maka’as ba dezenvolvimentu
DILI,14 novembru 2020 (TATOLI)—Diretór Jerál SEFOPE, Paulo Asis, hateten Timoroan sira ne’ebé maka oras ne’e servisu iha rai-liur hanesan Irlánda, Inglatera, Austrália no Korea Súl kontribui maka’as ba dezenvolvimentu Timor-Leste.
”Durante ne’e joven sira servisu la’ós deit Korea ho Austrália maibé iha mós nasaun seluk hanesan Inglatera no Irlánda ne’ebé Timoroan barak mak servisu ne’ebá no sira hanesan eroi dezevolvimentu ba rai ida ne’e maske sira la ka’er pasaporte Timor-Leste maibé sira ka’er pasaporte Portugal no sira nafatin Timoroan tanba haruka osan mai família sira iha Timor,” dehan Paulo ba Tatoli, foinlalais.
Sira nia servisu iha rai-liur kontribui maka’as ba dezenvolvimentu ekonomia família no nasaun.
”Durante joven sira ba rai liur ne’e rezultadu ba dezenvolvimentu ekonomia iha rai laran ne’e signifikante tebes tanba ita kompara ho tinan uluk kafe mak segundu lugar ho mina maibé depois Timoroan sira ba servisu iha rai-liur liliu Korea Súl, Austrália, Inglatera no Irlánda agora sira nia ekonomia ne’e okupa segundu lugar ne’e signifika osan sira ne’ebé mak hetan iha ema nia rain sira haruka osan mai banku ho númeru boot tebes,”tenik tan.
Husi tinan 2018 to’o 2019, joven sira ne’ebé maka servisu iha Korea hodi haruka osan mai Timor-Leste hamutuk millaun $42, no Timoroan sira ne’ebé maka servisu iha Austrália komesa 2011 to’o 2019 konsege haruka osan mai Timor hamutuk millaun $19.
“Progresu ida ne’ebé mak traballadór sira ba servisu iha rai-liur hanesan Austrália no Korea Súl, Governu sustenta sira ba servisu iha rai-liur para kada fulan manda osan ba família hodi sustenta sira nia moris no mós bele dezenvolve ekonomia iha rai laran entaun Governu liu husi SEFOPE mós seidauk kua sira-nia osan maibé ida ne’e banku mak koa hira hira ami SEFOPE la hatene soke sira nia osan liuhusi banku serteza banku koa tanba ne’e regulamentu banku nian,’’ nia esplika.
Tuir planu ba 2021, Governu liuhosi Sekretáriu Estadu Formasaun Profesionál no Empregu (SEFOPE), sei asina akordu formal ho Governu Japaun no Kánada para haruka Timoroan ba servisu iha nasaun rua ne’e.
Jornalista : Felicidade Ximenes
Editór:Agapito dos Santos
