MNEC sei hato’o karta felisitasaun formál ba Prezidente Joe Biden
DILI, 16 novembru 2020 (TATOLI)-Ministra Negósiu Estranjeiru no Kooperasaun (MNEC), Adaljiza Albertina Xavier Reis Magno, informa Ministériu Negósiu Estranjeiru no Kooperasaun (MNEC) sei fasilita hato’o karta felisitasaun formál hosi Estadu Timor-Leste nian ba Prezidente eleitu foun Estadu Unidu Amérika (EUA), Joe Biden.
Notísia Relevante : PM Taur felisita Prezidente no Vise eleitu EUA
“Karta felisitasaun ne’e kompeténsia nivel Prezidente Repúblika (PR) ho Primeiru-Ministru (PM) maka hato’o, maibé MNEC sei fasilita karta to’o iha Estadu Unidus Amérika (EUA),” Ministra Adaljiza Magno, informa, ohin, iha Palásiu Prezidensiál, Dili.
Nia hateten, daudaun ne’e hato’o ona parabens ba Prezidente eleitu EUA, maibé ho de’it informalmente no formál sei hato’o bainhira simu ona posse tuir ajenda iha janeiru 2021.
“Ita agora fó ona parabens informalmente hanesan hosi mídia sosiál tanba daudaun komisaun eleitorál la’o hela iha EUA seidauk deklara ofisiálmente kona-ba Prezidente eleitu foun, tanba ne’e, bainhira deklara ofisiál ona, ita sei haruka felisitasaun formál,” Adaljiza Magno hateten.
Prezidente eleitu EUA, Joe Biden, ho naran kompletu Joseph Robinette Biden JR, ho idade tinan-77, moris iha Scranton, Pennsylvania, iha loron 20 novembru 1942, nu’udár polítiku Amérika nian ida ne’ebé eleitu ba Prezidente EUA ba dala-46 hafoin manan iha eleisaun prezidente EUA kontra nia rival polítiku prezidente atuál Donald Trump.
Dokumentu biografia badak ne’ebé públika iha sítiu Wikipedia.org versaun lian Indonézia haktuir katak Joe Biden nu’udar membru Partidu Demokrátiku (PD) ne’ebé sei simu tomada posse nu’udar prezidente EUA iha janeiru 2021. Nia mós uluk nu’udár vise prezidente EUA hosi tinan 2009 to’o 2017 no hanesan mós Senadór senior hosi Delaware iha tinan 1973 to’o 2009.
Joe Biden, hosi família Joseph R. Biden, Sr (aman) no Catherine Eugenia Finnegan (inan). Nia oan ba da-uluk hosi maun-alin na’in-haat ne’ebé boot hosi família relijiaun Katóliku Roma.
Iha 1961, Joe Biden akaba nia estudu iha Archmere Academy iha Claymont no iga tinan 1965 hosi University of Delaware iha Newark. Nia kontinua nia estudu iha Syracuse University College of Law, no finaliza ka akaba iha tinan 1968.
Iha 1966, Joe Biden kaben ho Neilia Hunter. Sira na’in-rua iha oan na’in-tolu; Joseph R. III (Beau), Robert Hunter, ho Naomi.
Nia espoza ho nia oan-sira ne’ebé sei bebé mate hotu iha asidente tráfegu molok nia eleitu ba sai Senadór iha tinan 1972. Iha tinan 1977, Joe Biden kaben fali ho Jill Tracy Jacobs, sira iha oan na’in ida ho naran Ashley.
Jornalista : Nelson de Sousa
Editór : Francisco Simões
