DILI, 18 novembru 2020 (TATOLI)- Servisu Migrasaun Postu Integradu Batugade servisu hamutuk ho Unidade Patrullamentu Fronteira (UPF) detein Timoroan na’in-50 ne’ebé halo atividade kontra bandu durante implementasaun Estadu Emerjénsia (EE) dahituk.
Diretór Jerál Servisu Migrasaun, Superintendente Asistente, Luis Soares Barreto, hateten Timoroan hirak ne’e Migrasaun no UPF detein durante fulan novembru no outubru, tinan ne’e.
Nia dehan, Servisu Migrasaun koopera di’ak tebes ho UPF, Autoridade Aduaneira, inklui F-FDTL halo kontrolu másimu ba dalan ilegál sira hodi evita halo tranzasaun negósiu no viajen ilegál hodi evita propagasaun COVID-19 tama territóriu Timor-Leste
“Ami konsege detein Timoroan na’in-50 ne’ebé tama-mai Timor-Leste liuhosi dalan ilegál depois ami entrega ba Ministériu Saúde hodi kumpre konfinamentu obrigatóriu iha Batugade no Dili,” n Superintendente Asistente, Luis Soares, hateten ba jornalista liuhosi konferénsia imprensa, ohin, iha Ministériu Interiór, Dili.
Tuir lista Servisu Migrasaun nian katak iha novembru, sidadaun estranjeiru ne’ebé halo viajen tama legál mai territóriu Timor-Leste hamutuk na’in-298 no sai hosi Timor-Leste ema nain 152 liuhosi dalan legál.
Servisu Migrasaun mós aplika lei ba ema ne’ebé UPF detein durante halo atividade negósiu ilegál no la iha dokumentu hanesan pasaporte ruma hodi hakat tama área jurizdisaun Timor-Leste no selu multa $30,00 to’o $250,00 depende ba infrasaun iha terrenu.
Migrasaun sei investiga kazu sidadaun Bangladés
Iha parte seluk, Superintendente Asistente, Luis dehan, sira-nia parte sei investiga kazu sidadaun Bangladés ho naran Nasim Raza ne’ebé hala’o servisu iha Kompañia Flamingo abandona tiha ninia responsabilidade.
“Kona-ba kazu sidadaun Bangladés ne’ebé viral iha média sosiál hosi parte Migrasaun nian ami sei halo hela prosesu kona-ba nia vistu ne’ebé mak iha ne’e permanénsia iha Timor ka oinsá,” nia informa.
Luis dehan, bainhira halo tiha investigasaun ba sidadaun ne’e, sira-nia parte sei halo relatóriu hodi buka solusaun ba problema ne’e.
Nasim Raza nu’udar jestór komputadór iha Flamingo durante fulan ualu ona la simu nia saláriu hosi kompañia Flamingo.
Migrasaun mós husu ba traballadór ne’e atu hato’o keixa ne’e ba autoridade SEFOPE hodi buka solusaun ba ninia direitu ne’ebé kompañia viola ka abandona.
Jornalista : Eugénio Pereira
Editór : Francisco Simões
