DILI, 20 novembru 2020 (TATOLI)- Tribunál Distritál Dili, foin lalais, aplika prizaun preventiva ba suspeitu ho inisiál LBB ne’ebé lori tudik modo hakanek ninia eis namorada ODM.
Notísia Relevante : Alin feto ida hetan sona hosi nia eis namoradu
Segundu Komandante Polísia Nasionál Timor-Leste Munisípiu Dili, Superintendente, Euclides Belo, informa, ohin, ba jornalista sira iha Komandu PNTL Dili, dehan suspeitu LBB kumpre prizaun preventiva iha Prizaun Becora hodi hein prosesu akuzasaun hosi Ministériu Públiku ba aktu ne’ebé nia komete hasoru vítima ODM.
Kronolojia kazu tentativa omisídiu ne’e akontese iha vítima nia kos (kuartu aluga) iha Aldeia Moris Foun, Suku Comoro, Postu Administrativu Don Aleixo, Munisípiu Dili, segunda (16/11), purvolta tuku 09:50 dadeer.
Vítima rasik hala’o tratamentu saúde iha Sentru Saúde Comoro no rekupera ona hodi aprezenta ona kronolojia ba parte PNTL no enkamiña ba Ministériu Públiku hodi hein audiénsia julgamentu.
Euclides Belo apela ba inan-aman-sira ne’ebé hela iha foho no haruka oan-sira mai eskola iha Dili hodi aluga kos tenke kontrola beibeik sira hodi evita problema no kazu hanesan.
Jornalista : Eugénio Pereira
Editór : Francisco Simões
