DILI, 23 novembru 2020 (TATOLI)-Komisaun Anti-Korrupsaun (CAC), ohin, ofisiálmente hahú hala’o sensibilizasaun dahuluk ba lei Medida Preventiva no Kombate Korrupsaun (MPCC) ba kargu xefia sira iha Sekretária Estadu Formasaun Professional no Empregu (SEFOPE).
Sensibilizasaun ne’e hala’o iha salaun enkontru SEFOPE ho tema “Hasa’e koñesimentu ajente públiku kona-ba lei medida prevensaun no kombate korrupsaun” ne’ebé partisipa direita hosi Sekretáriu Estadu Formasaun Profisionál no Empregu, Alarico do Rosario, kargu xefia, xefe departamentu hotu ne’ebé tutela ba iha SEFOPE .
Iha abertura, Alarico do Rosario, hateten, sensibilizasaun ne’e importante tebes ba SEFOPE, nune’e kargu xefia iha SEFOPE bele hatene lala’ok tuir regra lei foun ne’ebé sei implementa iha instituisaun Estadu hotu.
“Ha’u husu ba ita hotu tenke foku ba saida mak CAC sei aprezenta hodi nune’e bele aumenta ita-nia koñesimentu,” Sekretáriu Estadu Alarico do Rosario hateten.
Nia espera ho lei ne’e sei hadi’a prestasaun servisu instituisaun nian hodi serve Estadu ba povu nia moris di’ak.
Komisáriu CAC, Sergio Hornai, iha nia intervensaun hateten, objetivu hosi sensibilizasaun ne’e atu Konsensializasaun informasaun ba funsionáriu públiku atu partilla ho antesedénsia hodi bele funsionáriu hotu iha koñesimentu hanesan liu-liu iha kargu xefia atu bele hametin boa governasaun, transparénsia, akontabilidade, responsabilidade, ses konflitu interese no posivelmente atu hadook-an hosi responsabilidade iha parte administrativa no mós ba iha kriminalidade ninian.
Nia dehan, lei númeru 7/2020, 26 agostu kona-ba MPCC ne’ebé Prezidente Repúblika promulga ona no sei tama iha vigor iha loron 26 fevereiru 2021 ho nune’e CAC presiza servisu besik ba liña ministerial hotu tanba sei hasoru diretamente lei refere.
Diresaun Sensibilizasaun iha CAC hahú iha fulan novembru komesa introdús sensibilizasaun ba liña ministerial sira.
“Ha’u lori CAC nia naran agradese ba SEFOPE hodi simu ami nia konvite atu realiza semináriu ida tau atensaun ho finalidade oinsá mak bele buka arranju hotu fahe informasaun relativamente polítika prevensaun hodi konsolida esforsu-sira oinsá hametin boa pratika iha servisu ho di’ak,” Sergio Hornai hateten.
CAC nu’udar órgaun ka instituisaun mai ho nia kbiit oinsá halo medida polítika prevensaun hamutuk ho entidade Estadu hotu-hotu hodi bele hametin vizaun Estadu direitu demokrátiku.
Sergio Hornai, hatutan, matéria sira aprezenta durante iha sensibilizasaun liga objetivu Estadu nian kria lei MPCC rasik no deklarasaun rendimentu, bens no interese, ne’ebé kuandu lei vigor kargu xefia to’o ba xefe departamentu-sira sei halo deklarasaun.
Tuir planu CAC sei realiza mós sensibilizasaun hanesan ba liña ministerial-sira no instituisaun Estadu iha territóriu laran tomak.
Jornalista : Nelson de Sousa
Editór : Francisco Simões
