Deskonfia, prezidente ANC iha relasaun ho ligasaun internet ilegál

DILI, 26 novembru 2020 (TATOLI)– Polísia Nasional Timor Leste (PNTL) liuhosi Servisu Investigasaun Kriminál (SIC), ohin, purvolta tuku 11:00 Otl,  halo detensaun ba prezidente Autoridade Nasional ba Komunikasaun (ANC), João Oliveira Freitas, tanba deskonfia iha relasaun ho ligasaun internet ilegál ne’ebé durante ne’e komete hosi operadór Telekomunikasaun Telemor no kompañia Elite Computer.

Notísia Relevante : SIC sobu sistema koneksaun rede internet hosi Elite Computer iha Balibo

Autoridade Polísia Timor-Leste hamutuk ho ekipa konjunta diretamente tama ba edifísiu ANC nian iha Ministériu Transporte no Komunikasaun (MTK) iha Caicoli, Dili, hodi halo buska no detensaun ba prezidente ANC hodi kumpre mandadu buska, detensaun no apreensaun hosi  Tribunál Distritál Dili (TDD) ho NUK 0166/20/PNSIK, nune’e bele submete ba investigasaun no aprezenta ba primeiru interogatóriu iha TDD.

Tuir dokumentu ne’ebé sai baze ba SIC hodi halo detensaun ba prezidente ANC ne’e  tanba  deskonfia halo koordenasaun servisu ho suspeitu jestór prinsipál   Elite Computer ho inisiál MS no suspeitu jestór prinsipál  Telemor ho inisiál TVB, hodi halo fornesimentu internet ilegál foti hosi rede Indonézia ba instituisaun Governu Timor-Leste, inklui Komandu Jerál PNTL.

Suspeitu na’in tolu deskonfia komete iha kazu fraude fiskál no burla informátika ne’ebé fó prejuizu ba Estadu Timor-Leste lakon osan barak.

Tuir observasaun jornalista Agência TATOLI nota, durante ezekuta mandadu buska, detensaun no apreensaun, parte SIC halo apreensaun dokumentu importante-sira relasiona ho kontratu servisu liga ho Kompañia Telemor, Elite Computer, inklui prosesu selu taxa ne’ebé parte ANC rekolla hosi Elite Computer no Telemor nian durante ne’e.

Parte investigadór SIC nian ne’ebé hetan apoiu hosi tékniku teknolojia informátika (IT) Timoroan balun foti hotu dadus kontratu hosi kompañia fornesedór liña internet hamutuk haat (4) no kompañia haat (4) maka la rejista iha ANC inklui Elite Computer no seluk tan.

SIC mós halo kedas apreensaun no rekolla dokumentu hanesan, laptop-macBook-AIR ne’ebé suspeitu JF uza, dokumentu importante-sira, hanesan karreta,  mobile spectrum ida ne’ebé uza atu halo kontrolu ba liña internet ilegál, totál tore kompañia Telemor nian  iha territóriu Timor-Leste ho liña transmisaun rede internet ho lisensa, relatóriu kona-ba monitorizasaun frekuénsia internet hosi tinan 2017 to’o setembru 2020, prosesu AFP hosi dokumentu 12 ne’ebé ANC rejista no públika iha sítiu  ANC nian no kompañia haat (4) nian dokumentu ne’ebé ANC seidauk públika iha sira-nia sítiu  no reseita ne’ebé ANC rekolla  hosi kompañia operadór Telemor durante  2017 to’o setembru 2020 nian.

SIC  lori kedas prezidente ANC ba detein iha sela SIC nian iha Komandu Jerál PNTL, Caicoli, Dili, hodi kontinua submete ba prosesu investigasaun.

Jornalista   : Eugénio Pereira

Editór        : Francisco Simões