DILI, 28 novembru 2020 (TATOLI) – Tribunál Distritál Díli (TDD), ohin, liuhosi desizaun julgamentu primeiru interrogatóriu aplika medida koasaun prizaun preventiva ba jestór prinsipál operadór Telekomunikasaun Telemor ho inisiál TVB no jestór prinsipál kompañia Elite Computer ho inisiál DP.
Notísia Relevante : Kazu Telemor-Elite Computer, MP akuza arguidu-sira ho krime burla informátika no fraude fiskál
Polísia Nasionál Timor-Leste (PNTL) liuhosi Servisu Investigasaun Kriminál (SIC) detein arguidu TVB iha ninia servisu fatin Telemor, CBD-4 Timor Plaza no arguidu DP detein iha ninia servisu fatin Colmera, Dili, iha loron 23 novembru 2020.
Prosesu ne’e deskonfia arguidu-sira halo korrelasaun servisu hodi fasilita utiliza internet ilegál ne’ebé uza satélite Indonézia nian ho kapasidade 600MBS hodi fasilita ba liña ministériu sira balun inklui ba Komandu Jerál Polisia Nasionál Timor-Leste (PNTL).
Autoridade polísia deteta kazu ka konspirasaun fornesimentu liña internet ilegál ne’e hahú kedas hosi tinan 2012 mai to’o 2018, nune’e fó prezuiju ba Estadu Timor-Leste lakon osan barak.
Ministériu Públiku (MP) akuza arguidu na’in-rua TVB no DP ho krime tolu hanesan brankamentu kapitais ne’ebé previstu iha artigu 313 ,burla informátika agravadu ne’ebé previstu no punidu iha artigu 269 no krime fraude fiskál ne’ebé previstu iha artigu 314 kódigu penál Timor-Leste.
Tribunál aplika medida koasaun prizaun preventiva tanba Juiza Ercila da Costa, haree katak iha indísiu forte arguidu-sira iha envolvimentu ba prosesu kazu ne’e.
Audiénsia julgamentu primeira interrogatóriu ne’e prezide hosi Juiz Ercila da Costa, Ministériu Públiku reprezenta hosi Prokuradór Matias Soares no Prokuradora Lidia Soares. Arguidu na’in-rua hetan asisténsia legal hosi advogadu privadu Pedro Aparício.
Jornalista : Nelson de Sousa
Editór : Francisco Simões
