DILI, 30 novembru 2020 (TATOLI)—Sekretária Estadu Igualidade no Inkluzasaun (SEII), ohin, oferese formasaun ba prizioneiru na’in-26 iha Prizaun Becora, Dili, ho tema “Kontrolu Hahalok Hirus”.
Diretora Diresaun Nasionál Abordajen Integradu Jéneru Kapasitasaun Muller (DNAIGCM- sigla portugés), Maria Filomena Babo Martins, hateten objetivu hosi formasaun ne’e atu muda prizioneiru sira-nia mentalidade no fanu sira-nia konsiénsia ba buat ne’ebé mak sira halo ona durante ne’e, atu bele sai di’ak liután iha futuru.
“Ohin ita fó formasaun ba ita-nia prizioneiru sira hamutuk na’in-26 ho objetivu atu muda sira-nia mentalidade no fanu sira-nia konsiénsia ba hahalok ne’ebé durante ne’e halo to’o tama prizaun atu bele sai di’ak liután iha futuru,” Maria Filomena Babo Martins hateten ba jornalista sira iha Prizasaun Becora, Dili, segunda ne’e.
Nia hatutan, SEII fó apoiu formasaun ba prizioneiru sira tanba hatene katak liuhosi formasaun ne’e sei motiva sira oinsá bele kontrola hahalok hirus, liuliu sira bele kontrola–aan hosi hahalok hirus sira.
“Prizaun nu’udár fatin ida atu hadi’a ita-nia aan, atu muda ita-nia mentalidade. Tanba ne’e, ita hotu presiza apoiu malu. Tanba imi monu ona ba rai kuak, ami tenke lori imi ba naroman. Tanba dalan ida ne’e la’ós imi mesak mak bele mai iha ne’e maibé sidadaun ida-idak feto no mane bainhira nia la kuidadu no la toma antensaun ba nia-aan, bele monu ba fatin ida-ne’e. Tanba ne’e mak ami mai iha ne’e atu ita fó apoiu ba malu, fanu malu fali atu hamrik iha dalan loos ida de’it, tuir Nai Maromak nia hakarak no tuir ita-nia dutrina Igreja Katólika nia hanorin,” diretora ne’e esplika.
Entretantu, Diretór Estabelesimentu Prizionál Becora, João Domingos, agradese ba reprezentante Governu liuhosi SEII ne’ebé kada tinan sempre fó formasaun ba prizioneriu sira.
“Agradese barak ba SEII ne’ebé kada tinan sempre mai fó formasaun ba ita-nia prizionéiru sira. Ha’u fiar no garantia katak liuhosi formasaun ne’e ita-boot sira bainhira fila-fali ba komunidade sei lori buat ne’ebé imi aprende iha prinzaun laran. Tanba fatin ida-ne’e, fatin ida-ne’ebé atu eduka imi atu sai ema,” nia subliña.
Tanba ne’e, nia apela ba prizioneiru sira ne’ebé tuir formasuan ne’e katak bainhira formadór sira hanorin kona-ba konrolu hahalok violentu, tenke rona ho laran no labele rona de’it, maibé tenke tau iha prátika nune’e bele la’o tuir hodi sai ema ne’ebé di’ak liután iha komunidade nia leet iha futuru.
Jornalista: Osória Marques
Editór: Cancio Ximenes
