DILI, 06 janeiru 2021 (TATOLI)–Kompañia fornesedór Cesta bázika hahú enfrenta difikuldade asesu produtu lokál iha territóriu tomak ne’ebé hahú menus no folin sa’e.
“Ami emprezáriu sira hahú enfrenta difikuldade tanba produtu lokál iha territóriu laran hahú menus no folin sa’e. Lansamentu dahuluk Cesta Bázika iha Uatulari ami hola ho presu ne’ebé di’ak tebes, maibé bainhira tama to’o klaran maka kolega sira hotu buka rekolla lisuk, entaun fo’os komesa menus no folin sa’e,” Diretór kompañia Green Mota-ain, Domigos Soares Perreira, informa hafoin enkontru ho Diretór Jerál Sekretaria Estadu Kooperativa (SEKoop) hodi halo avaliasaun ba kompañia fornesidór Cesta Bázika iha edifísiu Fundasaun Hanai Malu, kuarta ne’e.
Notísia Relevante: Aprovizionamentu akizisaun produtu Cesta Bázika uza modalidade adjudikasaun direta
Diretór ne’e mós rekoñese katak, produtu lokál menus no komunidade ne’ebé fa’an produtu hasa’e folin tanba kompañia fornesedór sira ho númeru boot maioria rekolla iha baze.
“Ita rekolla hare tama uma sai uma, maski barak maibé komunidade labele fa’an hotu tanba balun sira tenke rai hela atu han no halo fini,” nia akresenta.
Kona-ba produtu lokál seluk hanesan batar, diretór ne’e dehan sei sufisiente hela maibé koto, fore -mungu, fore-rai, fore-keli maka kompañia susar atu hetan tanba komunidade kuda oituan liu.
Kompañia Green Mota-ain mós enfrenta difikuldade boot iha tempu udan tanba bainhira atu transporta produtu sira iha munisípiu ba postu administrativu to’o suku no aldeia dalan la di’ak.
“Kuandu tempu udan ami labele ho karreta ba to’o aldeia, tanba rai namdoras no ami preiza fali loron rua to’o tolu bainhira rai maran mak foin bele ba halo distribuisaun,” Domigos Soares esplika.
Maski ho difikuldade hirak ne’e, maibé na’in ba kompañia Green Mota-ain otimista sei bele halo distribuisaun Cesta Bázika ho susesu tuir kontratu ne’ebé Governu estabelese ona.
“Ami fiar katak, ami sei bele halo no sei distribui to’o finál. Bainhira produtu importadu hanesan mina laiha, ita bele substitui ho produtu lokál sira hanesan mina nuu. Tanba ne’e, ami-nia produtu ne’ebé iha sei bele distribui ba suku tolu to’o lima,” nia hatutan.
Iha fatin hanesan, Diretór Jerál SEKoop, Domigos Xavier, husu ba kompañia sira atu kontinua kumpre kontratu ne’ebé antes ne’e selebra ona ho Governu maski hetan difikuldade.
“Sira tenke kontinua nafatin halo distribuisaun ba ita-nia komunidade no kompañia sira tenke esforsu atu buka produtu lokál hodi sosa, ida-ne’e mak ohin ha’u orienta,” nia hateten.
Kona-ba difikuldade iha tempu udan, Tuir Dirijente ne’e, problema ne’e akontese tanba situasaun, kondisaun no natureza maka nune’e duni, tanba ne’e husu kompañia sira kontinua halo serbisu tuir kontratu ne’ebé iha.
“Difikuldade ne’ebé kompañia sira enfrenta, ita-nia natureza mak hanesan ne’e ona, ne’ebé hakarak ka lakohi sira tenke responsabiliza kontratu ho kulakér maneira atu fó duni benefísiu ba benefisiáriu sira,” nia orienta.
Jornalista: Natalino Costa
Editora: Julia Chatarina
