DILI, 25 janeiru 2021 (TATOLI)—Autoridade Nasionál Petróleu no Minerál (ANPM) hanesan órgaun reguladór atu haree no avalia proposta empreza Santos Limited, ne’ebé hatudu katak rezevatóriu téknika no komersiál viavel atu halo perfurasaun ba postu tolu iha kampu Bayu-undan.
“Ami finaliza ho desizaun katak investimentu Santos sei la prejudika Estadu, maski iha postu tolu ne’e maran hotu, entaun bele estende tan kampu nia tinan ida tan tanba anteriormente tinan 2022 hotu ona, maibé bainhira konsege fura, desmantela kampu bele akontese iha 2023 ou liu. Karik iha sorte bele fó reseita ba Estadu purvolta millaun $100-resin, depende ba deskobrementu iha kampu,” Prezidente ANPM, Florentino Mateus Soares Ferreira, informa iha salaun Ministériu Finansa, Aitarak-laran, segunda ne’e.
Tuir Florentino, antes ne’e empreza australiana ne’e kontaktu ona autoridade, kona-ba desizaun hakarak investe iha kampu petrolífera Bayu-undan.
“Santos anúnsia ona iha mídia internasionál no kontakta ona ami halo investimentu iha tempu difísil hanesan COVID-19 ne’ebé afeta ba folin mina merkadu monu, maibé sira foti ona desizaun atu investe $235 atubele halo ativiade perfurasaun mina no gás,” nia haktuir.
Notísia relevante: Santos deside investe millaun $235 fura mina-matan tolu iha Bayu-undan
ANPM nota katak empreza petrolífera ne’e lakohi lakon oportunidade, tanba ne’e foti desizaun atu hala’o atividade petrolífera.
“Hein katak meiu tinan ida ne’e bele fura ona, ne’ebé iha rezutadu ba empreza no Timor-Leste rasik,” nia akresenta.
Daudaun ne’e, produsaun iha kampu Bayu-Undan hahú menus.
“Ita agora tama ona iha faze produsaun menus, husi kada loron prodús barríl 20.000, tun ba barríl 18.000, enkuantu gás mós menus maibé prodús bee mak barak liu purvolta 40.000, ne’e hatudu katak kampu besik ona fim do vida,” Prezidente ANPM subliña.
Durante ne’e, projetu Bayu-undan kontribui ona reseita ba Estadu Timor-Leste, ba fundu petrolíferu hamutuk biliaun $20 resin.
Jornalista: Florêncio Miranda Ximenes
Editora: Julia Chatarina
