DILI, 25 janeiru 2021 (TATOLI)–Ministru Defeza, Filomeno da Paixão de Jesus aprezenta ona proposta ba Konsellu Ministru hodi hato’o ba Prezidente Repúblika, Francisco Guterres Lú Olo atu nomea tan veteranu antigu balun iha Komandu F-FDTL asume kargu Brigadeiru Jenerál.
“Ami iha lista aprezenta ona ba Konsellu Ministru haree lejizlasaun F-FDTL sei ramata iha tinan 2021 no haree mós lei promosaun diviza. Iha proposta ba jenerál sira atu bá tuur iha fatin Xefe Estadu Maior ne’e sei hein hela estudu hosi Prezidente Repúblika, tanba iha tan proposta ba Brigadeiru Jenerál,” Ministru Filomeno dehan hodi hatán pergunta Agência Tatoli iha Palásiu Prezidente Nicolau Lobato, Bairru Pité, Dili, segunda ne’e.
Maski la temi naran kandidatu Brigadeiru Jenerál ne’ebé sei halo promosaun diviza iha aniversáriu F-FDTL ba dala 20, iha 02 fevereiru 2021, maibé Ministru Filomeno fiar katak prosesu promosaun sei hala’o ho neutru.
Nia hateten, Komandu F-FDTL liuhosi Prezidente Repúblika sei entrega mós medalla kondekorasaun ba komandante F-FDTL na’in tolu inklui promosaun diviza ba membru balun.
Komandu F-FDTL lidera hosi Xefe Estadu Maiór Jenerál F-FDTL, Majór Jenerál Lere Anan Timur hamutuk ho Vise Xefe Estadu Maiór Jenerál F-FDTL, Brigadeiru Jenerál Domingos Raul “Falur Rate Laek”, Supervaizór Repartisaun Justisa F-FDTL, Brigadeiru Jenerál Américo Ximenes “Sabika Besi Kulit”, Diretór Gabinete Krize, Brigadeiru Jenerál João Miranda “Aluk Descartes” no Xefe Estadu Maiór F-FDTL, Koronél Calisto Santos Coli “Coliati”.
Jornalista: Eugénio Pereira
Editór: Xisto Freitas
