DILI, 26 janeiru 2021 (TATOLI)–Komandu Polísia Munisípiu Baucau entrega ona suspeitu ho inisiál EMF ne’ebé “foti-subar” osan no sasán eletróniku ba Komandu Polísia Munisípiu Dili, tersa ne’e.
Hafoin simu suspeitu refere, polísia sei aprezenta fali ba Ministériu Públiku hodi submete ba prosesu julgamentu iha tribunál.
Notísia relevante: PNTL detein suspeitu ‘foti-subar’ osan no sasán eletrónika
Komandante Polísia Munisípiu Dili, Superintendente Xefe, Henrique da Costa hato’o agradesementu ba kooperasaun servisu ho Komandu Polísia Baucau ne’ebé konsege detein suspeitu iha ninia subar fatin iha área Buburaga, Suku Gariuai, Baucau.
Suspeitu EMM PNTL detein tanba ezekuta mandadu detensaun Tribunál Distritál Dili ho númeru prosesu NUK.0642/2020.
Henrique dehan, PNTL mós sei buka tuir suspeitu na’in tolu seluk hanesan JMMA, GDC no GJX ne’ebé kolabora mós ho suspeitu EMM hodi halo asaun foti-subar sasán eletrónika no motór.
“Autór EMF halai sai hosi Eskuadra Polísia Dom Aleixo, depois autór ne’e organiza nia kolega na’in tolu (3) ho inisiál JMMA, GDC no GJX foti-subar sidadaun Timor balun nia motorizada atu fa’an, maibé PNTL identifika hetan hodi halo kapturasaun ba autór EMF,” Komandante Henrique ba jornalista iha Kuartél Jerál PNTL, Caicoli, Dili.
Suspeitu EMM hamutuk ho suspeitu JMMA, GDC no GJX envolve iha krime furtu agravadu ka foti-subar Xineza nia sasán iha 07 setembru 2020, tuku 03:30 madrugada iha área Fomento III, Suku Comoro, Postu Administrativu Dom Aleixo, Munisípiu Dili.
Suspeitu sira foti sasán sira iha loja hanesan osan, korente osan-mean no mutin no telemóvel.
Entretantu, Komandu PNTL Dili mós halo ona apreensaun ba motorizada públiku nian ne’ebé ema foti-subar inklui motór sira ne’ebé dokumentu laiha hamutuk 24. Motór hirak-ne’e hanesan evidénsia ne’ebé aseguradu ona iha edifísiu Ministériu Públiku.
Jornalista: Eugénio Pereira
Editór: Xisto Freitas
