iklan

NASIONÁL, EDUKASAUN, DILI, HEADLINE

Estudante 320.539 sei asesu hikas Merenda Eskolár

Estudante 320.539 sei asesu hikas Merenda Eskolár

Estudante Eskola Ensinu Basiku no Terseiru Siklu Esperança da Patria Becora, Dili. Imajen Tatoli/Egas Cristovão

DILI, 09 fevereiru 2021 (TATOLI)—Ministériu Edukasaun Juventude no Desportu (MEJD) liuhosi Diresaun Nasionál Asaun Sosiál Eskolár (DNASE), identifika ona estudante 320.539 iha territóriu tomak ne’ebé sei asesu hikas ba Programa Merenda Eskolár, tanba durante situasaun COVID-19 paradu.

Diretór Nasionál DNASE, Joaquim Martins hateten, tuir loloos programa ne’e reativa ona iha inísiu fulan janeiru, maibé parte Ministériu sei hein aprovasaun orsamentu hosi diresaun finansa Ministériu Administrasaun Estatál (MAE) munisipál.  

Notísia Relevante:WFP Kontinua Apoiu Governu Hadi’a Kualidade Merenda Eskolár

“Loloos ne’e implementasaun ba merenda eskolár ne’e hahú tiha ona iha 18 janeiru.  Signifika, data implementasaun ne’e liu ona loron 10,” Joaquim Martins hateten ba jornalista sira iha salaun Ian Martin INFORDEPE, Matadouru, tersa (09/02).

Diretór ne’e subliña, bazeia ba dekretu lei númeru 3 ne’ebé publika hosi MEJD hateten katak, ministériu ne’e haree de’it kona-bá loron efetivu sira, planifikasaun, monitorizasaun no avaliasaun ba Programa Merenda Eskolár, maibé kona-bá orsamentu responsabiliza hosi diresaun finansa MAE munisípiu.

Maski Diretór Joaquim la mensiona totál orsamentu ne’ebé prevee ba programa ne’e, maibé ninia implementasaun tuir buat ne’ebé mensiona katak, orsamentu transfere direta ba kada konta bankária finansa munisipál.

Iha prosesu no mekanizmu utilizasaun orsamentu ne’e, nia dehan, tenki halo uluk pedidu ba diretór Munisípiu sira atu haruka ba konta bankária diresaun finansa MAE iha munisípiu, hafoin bele halo levantamentu hodi transfere ba konta bankária kada sentru ensinu báziku atu bele implementa programa ne’e.

Kona-bá menu ba merenda eskolár ne’e nia sita katak, estudante sira tenki konsumu ai-han ne’ebé tama iha kategoria tolu mak hanesan ai-han karbohidratu, ai-han fó nutrisaun di’ak no ai-han ne’ebé haburas saúde, ezemplu hanesan etu, talas, modo-tahan, ai-fuan no na’an.

“Ai-han sira ba programa ne’e iha fleksibilidade tebes atu bele uza produtu ne’ebé mak ezisti iha kada Munisípiu tuir orientasaun hosi Ministériu Saúde no Ministériu Agrikultura,” nia salienta.

Entretantu, totál estudante 320.539 ne’ebé iha, kompostu hosi Ensinu Pré-eskolár Públiku Katólika 25.356 hosi eskola 430 no Ensinu Báziku 295.183 hosi eskola 1.268 iha munisípiu 12 inklui Rejiaun Administrativa Espesiál Oe-cusse Ambeno (RAOEA).

Jornalista: Tomé Amado

Editór: Cipriano Colo

iklan
iklan

Leave a Reply

iklan
error: Content is protected !!