DILI, 11 fevereiru 2021 (TATOLI)-Primeiru-Ministru, Taur Matan Ruak, husu ba públiku lalika preokupa ho levantamentu osan iha Banku Sentrál Timor-Leste (BCTL, sigla portugés) tanba daudaun saldo atuál iha tezouru sufisiente atu sustenta despeza trimestre dahuluk tinan ne’e, ne’ebé la prejudika funsionamentu Estadu.
“Ita la presiza preokupa tanba hanesan dapur karik, ema iha dapur mak hatene hahán to’o ona ba ita ka la’e, ne’ebé kuandu la to’o naturalmente nia tenke tein tanba ne’e la halo levantamentu la prejudika funsionamentu mákina Estadu,” PM Taur informa hafoin enkontru ho Prezidente Repúblika, Francisco Guterres ‘Lú Olo’, iha Palásiu Prezidensiál, Bairro Pité, kinta ne’e.
Notísia relevante: Saldo sei iha millaun $200-resin, Governu seidauk halo levantamentu
Tuir lei númeru 13/2009, 21 outubru, orsamentu no jestaun finanseira fó kompeténsia ba Ministériu Finansa (MF) atu jere finanseira Estadu Timor-Leste.
“Osan ne’e la’ós ita hanoin ba foti de’it, tanba ema (Ministériu Finansa) ne’ebé jere osan ne’e mak hatene no agora sira dehan seidauk iha nesesidade ba foti (levatamentu), ne’ebé ita sira iha li’ur ne’e ansi atu halo saida,” nia akresenta.
Xefe Governu hato’o kestaun ne’e relasiona ho informasaun sira iha públiku katak la halo levantamentu sei fó risku ba funsionamentu mákina Estadu.
Antes ne’e, MF klarifika katak saldo tezouru daudaun hamutuk millaun $266 sei sufisiente atu finansia despeza sira, tanba ne’e seidauk iha nesesidade halo levantamentu fundu petrolíferu.
Bainhira MF haree no kálkulu despeza liu ona orsamentu iha tezouru mak sei halo pedidu levantamentu ba BCTL atubele halo transferénsia orsamentu husi fundu petrolíferu iha Banku Federál Estadu Unidu Amérika (EUA).
Jornalista: Florêncio Miranda Ximenes
Editora: Julia Chatarina
