DILI, 18 fevereiru 2021 (TATOLI)—Ministériu Edukasaun Joventude no Desportu (MEJD) prevee ona millaun $2 hosi Orsamentu Jerál Estadu (OJE) 2021 atu halo konstrusaun ba edifísiu Ensinu Pré-Eskolár (EPE) 32 iha territóriu tomak.
“Tinan ne’e hosi Ensinu Pre-Eskolár hetan apoiu konstrusaun edifísiu hamutuk 32 ne’ebé ho sala-de-aula 64,” Diretór Nasionál Pré-Eskolár, Domingos Belo Soares hateten ba jornalista Agência Tatoli iha Sentru Formasaun Tibar.
Notísia Relevante:MEJD kontinua reforsa Ensinu Pré-Eskolár ho HANDS
Diretór ne’e hatutan konstrusaun edifísiu no sala-de-aula ne’e tama ona iha dadus eskola 222 ho sala-de-aula 600-resin ne’ebé Governu planeia atu konstrui no reabilita iha tinan ne’e.
“Ami hetan ona informasaun kona-bá ne’e tanba antes ne’e ami mak halo proposta no ami sei serbisu hamutuk ho Diresaun Infraestrutura Edukativa atu bele aselera prosesu ne’e,” nia hateten.
Maski jestaun ba orsamentu ne’e rasik sei responsabiliza hosi Diresaun Nasionál Infraestrutura Edukativa, maibé diretór ne’e hato’o nia prontidaun atu fó apoiu másimu, nune’e bele ezekuta hodi konstrui edifísiu sira ne’ebé tama ona iha planu.
Tanba ne’e, parte Ensinu Pré-Eskolár iha esperansa katak fulan marsu prosesu konstrusaun bele realiza ona.
Tuir dadus hosi MEJD hatudu katak, oras ne’e daudaun Ensinu Pré-Eskolár ne’ebé hetan ona akreditasaun hamutuk 299 iha territóriu tomak.
Notísia Relevante:MEJD sei konstrui edifísiu eskola CAFE haat ho millaun $4
Jornalista: Tomé Amado
Editór: Cipriano Colo
