ERMERA, 20 fevereiru 2021 (TATOLI)—Banku Sentrál Timor-Leste (BCTL, sigla portugés), realiza formasaun sobre peskiza karateristika ekonómika no inkluzaun finanseira ba enumeradór sira ba estudante Ensinu Sekundária Katólika Nossa Senhora do Carmo Letefoho, Munisípiu Ermera.
Vise-Governadora BCTL, Nur Aini Alkatiri hateten, objetivu hosi programa ne’e atu fó formasaun ba estudante sira nune’e ba halo peskiza iha komunidade nia leet relasiona ho atividade ekonómika finanseira iha Postu Administrativu Letefoho.
“BCTL plenea atu realiza programa espesífiku ida-ne’e atu ajuda populasaun sira liuliu sira-ne’ebé iha negósiu para sira bele jere sira-nia negósiu nune’e bele tulun ekonomia família. La’ós de’it iha parte ekonomia maibé relasaun mós ho finanseira, no ba-oin BCTL sei hala’o atividade edukasaun finanseira,” Vise-Governadora BCTL hateten liuhosi intervensaun iha ámbitu formasaun ne’ebé hala’o iha igreja antigu Letefoho, sábadu ne’e.
Nia hatutan, iha diskusaun durante ne’e deside molok realiza programa ida espesífiku ba Letefoho presiza halo peskiza uluk para ami intende didi’ak atividade ekonomia no finanseira Letefoho nian. Hosi rezultadu peskiza ne’e, Banku Sentrál sei analiza di’ak hodi kria programa espesífiku programa ida iha Letefoho.
Vise-Governadora ne’e husu ba estudante sira-ne’ebé mak partisipa atu akompaña didi’ak matéria sira-ne’ebé mak sei fó hosi ekipa BCTL nian durante loron ida.
“Peskiza ne’ebé sei hala’o hosi estudante sira-ne’e importante tebes ba banku sentrál tanba hosi rezultadu peskiza ne’e mak sei determina programa saida mak sei halo ba-oin. Ami sei kontinua programa ne’e tanba saida mak deside Letefoho tanba ami konsidera Letefoho ne’e espesiál ba BCTL,” Nur Aini Alkatiri dehan.
Iha fatin hanesan, Diretór Eskola Nossa Senhora do Carmo, Padre Helio Fernandes agradese ba BCTL tanba bele hili eskola Nossa Senhora do Carmo Letefoho sai hanesan alvu hodi estudante sira ba halo peskiza.
“Ami espera ita-nia kooperasaun ita-bele tulun malu atu programa ne’e la’o ba oin, nune’e mós estudante sira bele sai rai hanesan bukae ida ba sira. Tanba aléinde aprende iha eskola, sorin seluk sira hetan tan buat di’ak hosi liur ne’ebé estudante sira seluk labele hetan no hosi formasaun ne’e mós loke estudante sira-nia hanoin kona-ba sira-nia realidade moris, ekonomia, jestaun iha vida loro-loron,” Padre Helio Fernandes hateten.
Diretór eskola katólika ne’e promete, nia parte prontu koopera nafatin ho BCTL atu hakle’an liután matéria sira durante formasaun nune’e bele realiza peskiza ida hodi hetan rezutadu ne’ebé di’ak.
Iha biban ne’e, Administradór Postu Administrativu Letefoho, Julião Marito de Deus, hateten maiória populasaun Letefoho hala’o vida negósiu ativu iha setór oioin.
“Formasaun ne’e importante tebe-tebes no di’ak liu mak estudante sira mak hetan uluk, ne’e pasu pozitivu ida ba ami. Tanba hafoin sira hetan tiha formasaun, sei hato’o fali ba sira-nia inan-aman no komunidade sira. Ha’u bele dehan katak komunidade ninia vontade aas tebes iha negósiu,” nia dehan.
Administradór postu ne’e mós preokupa, katak rendimentu komunidade nian loron-loron sufisiente hela maibé tanba kustume Timór nian mak halo kultura nune’e rendimentu sira-ne’e nabeen hotu ba lia, maibé ho formasaun sira-ne’e bele loke ona komunidade nia hanoin oinsá rai osan hodi hadi’a ekonomia família.
Formasaun ne’ebé hala’o durante loron ida ne’e, partisipa hosi vise-governadora BCTL ho ninia ekipa, Diretór Eskola Katólika Nossa Senhora do Carmo Letefoho, padre Helio Fernades, Pároku Letefoho, Eugénio Redentor, Administradór Postu Letefoho, xefe suku no estudante sira.
Jornalista: Antónia Gusmão.
Editór: Cancio Ximenes
