Presiza vontade polítika forte kombate korrupsaun

DILI, 22 fevereiru 2021 (TATOLI)-Ministru Prezidénsia Konsellu Ministru (PCM), Fidelis Manuel Leite Mangalhães, afirma presiza vontade polítika ida forte hodi kombate korrupsaun iha Timor-Leste.
Nia hateten, prezensa lei foun kona-ba Medida Prevensaun no Kombate Korrupsaun (MPKK) nu’udar renovasaun Estadu hodi prevene no kombate korrupsaun iha Timor-Leste.
Notísia Relevante : CAC presiza haforsa estrutura implementa lei MPKK
Liuhosi nia diskursu iha aniversáriu Komisaun Anti-Korrupsaun (CAC) ba dala-XI, segunda ne’e, Ministru Fidelis Manuel Leite Mangalhães, afirma kna’ar ida ba luta kontra korrupsaun la’ós CAC mesak maibé responsabilidade órgaun Estadu hotu no autór polítiku ho sosiedade sivíl nian. Nune’e luta hasoru korrupsaun sai efetivu liután presiza parte hotu nia kontribuisaun no apoiu vontade polítika ne’ebé aas.
Ministru Fidelis Manuel Leite Mangalhães, kongratula ba melloria presaun Timor-Leste nian klasifikasaun tuir relatóriu transparénsia internasionál korrupsaun 2020 ne’ebé hatuur rekoñesimentu pozitivu ba Timor-Leste tanba Estadu iha vontade polítika aprova ona lei MPKK.
Nia dehan, ho implementasaun lei MPKK sei lori impaktu ne’ebé boot ba forma ema moris, tantu iha polítika, sosiál, ekonómiku nune’e mós entre kargu xefia iha administrasaun públika sei lori paradigma foun oinsá sosiedade bele funsiona.
“Tenke hadi’a liután hodi estuda hamutuk hodi hetan melloria sira ne’e no razaun sira ne’ebé sai impedimentu ba luta kontra korrupsaun,” Fidelis Leite Mangalhães hateten.
Jornalista : Nelson de Sousa
Editór : Francisco Simões

