DILI, 23 fevereiru 2021 (TATOLI)-Rede ba Rai hamutuk ho abitante uma-kain 11 ne’ebé afetadu ba projetu konstrusaun Kuartél Jerál Polísia Nasionál Timor-Leste (PNTL), tersa ne’e, loke prosesu legál hasoru Ministru Justisa, Manuel Cárceres da Costa.
Keixa legál ne’e mós hasoru Diretór Diresaun Nasionál Terras no Propriedade (DNTP), Francisco R.B. Guterres ho Komandante Jerál PNTL, Komisáriu Faustino da Costa, liuhosi sira-nia depoimentu ne’ebé hatama ba Ministériu Públiku.
Notísia Relevante : Komunidade uma-kain 11 ho RbR husu indemnizasaun justu
Koordenadór Nasionál Rede ba Rai, Pedrito Viera, hateten Rede ba Rai hanesan organizasaun sosiedade sivíl ne’ebé durante ne’e halo advokasia ba asuntu rai nota no akompaña katak, prosesu refere komunidade uma-kain 11 sai vítima liu-liu prosesu administrasaun indemnizasaun Governu nian ne’ebé atu fó to’o agora seidauk iha konkordánsia no mós kontra lei espropriasaun ba rekizitu sira la prienxe.
Nia hateten, komunidade afetadu luta ba sira nia direitu hodi buka lia-loos liuhosi dalan legál, nune’e Rede ba Rai iha devér atu haree ba ema vulneravel ne’ebé sente ameasadu hodi hato’o keixa ba parte legál.
Ba jornalista sira hafoin hatama keixa ba MP, Pedrito Viera hateten, keixa krime ne’e aprezenta mós prova sira liu-liu kona-ba legalidade sertifikadu na’in ba rai ho sira seluk ba iha MP.
Maria Exposto, nu’udar komunidade afetadu, dehan rai ne’ebé sira okupa ho títulu privadu iha sertifikadu na’in ba rai no hela dezde iha tempu portugés.
“Hanesan sidadaun prontu kontribui ba dezenvolvimentu, maibé tenke ho lala’ok ne’ebé justu. Ami hato’o ona ezijénsia ba parte Governu, maibé atu selu de’it indemnizasaun ba uma no ai-horis maibé ba rai laiha,’’ nia hateten.
Rede ba Rai ho komunidade afetadu sei hato’o mós keixa refere ba Provedoria Direitu Umanu no Justisa (PDHJ) no preokupasaun sira ba iha Parlamentu Nasionál liu hosi Komisaun A trata asuntu justisa no konstitusionál ho Prezidente Repúblika.
Hatán ba kestaun ne’e, Ministru Justisa (MJ), Manuel Cárceres da Costa, hateten prosesu hotu tuir lei ne’ebé iha tanba ne’e sidadaun sira iha direitu la aseita ho buat ruma bele hato’o keixa. Nune’e, nia parte hein de’it notifikasaun hosi parte Ministériu Públiku atu bele ba hatán.
Jornalista : Nelson de Sousa
Editór : Francisco Simões
