DILI, 27 fevereiru 2021 (TATOLI)- Sentru Integradu Jestaun Krize Sala Situasaun (CIGC-SS) klarifika katak informa ne’ebé espalla públiku relasiona ho no media sosiál (Facebook) katak estudante ida iha Munisípiu Liquiça ho funsionáriu Ministériu Obras Públikas ida dehan katak pozitivu COVID-19 ne’e hotu la loos.
Notísia Relevante : Na’in-rua ne’ebé evakua hosi Salele, ida pozitivu COVID-19
“Ami hakarak informa mós públiku tomak katak informasaun ne’ebé loron-rua nia laran sirkula sai iha média sosiál (Facebook) kona-ba estudante iha Munisípiu Liquiça no mós funsionáriu Ministériu Obras Públikas ne’ebé dehan katak pozitivu COVID-19, informasaun hirak ne’e hotu la loos,’’ koordenadór Forsa Tarefa ba Prevensaun Metigasaun Surtu COVID-19 iha Timor-Leste, Rui Maria de Araújo, haktuir ba jornalista sira iha Sentru Konvensaun Dili (CCD), sábadu ne’e.
Nia husu ba populasaun tomak atu rona, no fiar de’it mak informasaun ne’ebé Governu fó sai, liuhosi CIGC-SS. Tanba ne’e, Rui Araújo, apela mós ba populasaun Timor-Leste tomak, atu nafatin matan-moris neon na’in no prátika nafatin medida sira ne’ebé hotu-hotu hatene ona; uza máskara, fase-liman beibeik ho sabaun, ka dezinfetante ruma, bainhira kumprimenta malu, la presiza ka’er-liman, la presiza bensa-liman, rei-malu ka hako’ak-malu. Evita halibur malu barak, hamriik ka tuur do’ok hosi ema seluk, mínimu metru ida ho balun.
Jornalista : Felicidade Ximenes
Editór : Francisco Simões
