DILI, 01 marsu 2021 (TATOLI)–Governu solidariza populasaun sira ne’ebé hela besik fronteira terrestre, ne’ebé mak sakrifika-an ona iha ámbitu prevensaun surtu COVID-19 iha Timor-Leste, liga ho implementasaun serka sanitária iha munisípiu rua Bobonaro no Covalima inklui Rejiaun Administrativa Espesiál Oé-cusse Ambeno (RAEOA).
“Governu solidariza sakrifísiu populasaun iha fronteira, ita laiha dalan seluk, tanba sakrifísiu ida ne’e la’ós ba dahuluk, tanba atu ita-nia nasaun hetan ukun-an, ita lakon ona ema 250.000 hodi Timór sai nasaun livre no independente, ne’e signifika konkista hotu ne’ebé ita hetan la hetan iha bandeiza laran, maibé hetan liuhosi sakrifísiu,” Primeiru-Ministru (PM), Taur Matan Ruak, deklara liuhosi intervensaun iha debate estensaun Estadu Emerjénsia (EE) da-11 iha Parlamentu Nasionál (PN), segunda ne’e.
Xefe Governu ne’e dehan, sakrifísiu sira nesesáriu atu PN preokupa, katak lakohi ema mate tanba moras no mate tanba hamlaha no Governu sensibilizadu ho preokupasaun PN maibé husu mós apoiu ba medida sira.
“Ho oportunidade ida-ne’e, agradese esforsu no komprensaun Parlamentu, tanba ne’e lori Governu nia naran, husu ba inan-aman hotu iha ne’ebé de’it liuliu sira ne’ebé iha fronteira terrestre iha ligasaun ho rai viziñu, atu halo sakrifísiu dala-ida tan hodi ita hotu bele evita ita-nia ema sira mate tanba moras COVID-19,” nia akresenta.
Xefe Ezekutivu nota katak, iha fulan-marsu tinan ne’e, kompleta tinan-ida povu Timor-Leste halo esforsu atu evita moras COVID-19 no agora hein tempu oitoan atu hetan vasina, ho hanoin katak sakrifísiu oitoan atubele evita sidadaun sira mate tanba moras ne’e.
Jornalista: Antónia Gusmão
Editora: Julia Chatarina
