SEPS la komemora loron mundiál defeza sivíl
DILI, 02 marsu 2021 (TATOLI)-Sekretária Estadu Protesaun Sivíl (SEPS) la komemora loron mundiál defeza sivíl tanba situasaun COVID-19.
Diretór Nasionál Bombeiru, Claúdio da Silva, hateten kada tinan, iha loron 03 marsu, mundu tomak inklui Timor-Leste komemora loron mundiál defeza sivíl, maibé tinan ne’e, la bele hala’o tanba COVID-19.
Notísia Relevante : Loron mundiál defeza sivíl, autoridade integradu Estadu presiza halo reflesaun
Mezmu nune’e, Claúdio da Silva, afirma atividade ligadu ba loron sira ne’e Bombeiru nafatin fó importánsia ba serbisu protesaun sivíl hanesan situasaun dezastre naturaís no kalamidade sira ho eskala boot.
“Konseitu prátika defeza sivíl iha Timor-Leste mak protesaun sivíl oinsá próteze ka atu salva ema nia vida no sasán tanba ne’e Estadu presiza fó protesaun di’ak ba sidadaun hotu ho seguru,” Diretór Nasionál Bombeiru, Claúdio da Silva hateten hodi responde Agência Tatoli iha nia servisu fatin, Dili, tersa ne’e.
Nia hateten, servisu protesaun sivíl liuhosi Korpu Bombeiru ninia kontribuisaun ba dezenvolvimentu nasionál ho nia papél fó resposta ba situasaun emerjénsia ka kalamidade sira ne’ebé mosu iha rai-laran.
Bombeiru iha membru operasionál na’in-259 ne’ebé koloka iha Munisípiu 10 no tinan ne’e planu sei estabelese tan Korpu Bombeiru iha Munisípiu Manatuto, Liquiça ho Ermera.
Bombeiru ninia intervensaun ba iha dezastre naturaís ka inséndiu saida de’it mak akontese iha territóriu hanesan ahi-han rai, anin sobu uma, ai-tohar, bee-sa’e, rai-monu, rai-halai ho sira seluk.
Nia hateten, mezmu Bombeiru iha dezafiu ho rekursu no ekipamentu natoon, maibé esforsu nafatin atu hala’o serbisu sira ne’e ho di’ak tanba ne’e Governu tutela presiza mós fó atensaun hodi apoiu fasilidade nune’e preparadu liután ba atuasaun servisu sira.
Tuir dadus hosi Korpu Bombeiru iha territóriu hosi fulan janeiru to’o daudaun rejista kazu 247 dezastre naturaís no inséndiu ne’ebé parte Bombeiru halo atuasaun ka intervensaun.
Jornalista : Nelson de Sousa
Editór : Francisco Simões
