DILI, 03 marsu 2021 (TATOLI)—Veteranu sira husu Governu tenke kontinua buka-tuir saudozu Nicolau dos Reis Lobato nia ruin tanba to’o agora seidauk anúnsia saudozu nia restu mortal nia paradeiru ba públiku.
Notísia Relevante: Lintil: “Loron 3 marsu laiha, ukun rasik-aan mós laiha”
“Ha’u-nia rekomendasaun ba Governu, atu buka-tuir ruin Prezidente Nicolau Lobato ne’ebé to’o agora ita seidauk hatene. Ha’u hatene hela buat ne’e balun, maibé ne’e iha lider sira-ne’ebé oras ne’e kaer Governu, ne’e sira mak husu ba malu. Prezidente ne’e ita-nian hotu, natoon ne’e nia lidera hodi hasoru invazaun Indonézia no halo buat ne’ebé di’ak ba Timor,” Veteranu Ernesto Fernandes ‘Dudu’ informa ba Agência TATOLI iha resintu Parlamentu Nasionál, foin lalais ne’e.
Nune’e mós Veterana Maria Rosa da Câmara ‘Bisoi’ mós hateten, dezde nasaun ida-ne’e independénsia ezijénsia atu buka-tuir saudozu Nicolau Lobato nia ruin ne’e tama kedas ona.
“Ne’e ita-nia ezijénsia nu’udar nasaun maibé ne’e órgaun soberania Timor-Leste nian hotu-hotu no líder istóriku sira tenke hamutuk ezije ba Governu Indonézia atu hatudu saudozu Nicolau Lobato ninia restu mortál iha-ne’ebé,” Veterana Bisoi hateten.
Tuir nia, selebrasaun loron nasionál ba veteran/a ne’e la sees hosi dedikasaun ne’ebé saudozu Nicolau Lobato halo ba rai ida-ne’e.
Entretantu, Veteranu Cornélio Gama ‘L7’ preokupa ho restu mortál saudozu Nicolau Lobato nian tanba Indonézia sira bele mai haree sira-nia forsa ne’ebé mate maibé to’o agora la fó hatene paradeiru grande eroi ne’e.
“Ita-nia relasaun diplomátika ne’e di’ak tebes, ne’e mak sira mai haree nia ema sira-ne’ebé mate iha funu laran. Maibé, ita-nian fali, ita-nia saudozu Nicolau Lobato nia restu mortal fali, sira la hatudu mai ita. Ha’u husu Estadu Timor-Leste atu tenke kontinua buka-tuir ruin saudozu Prezidente Nicolau Lobato nian,” nia tatoli.
Jornalista: Evaristo Soares Martins
Editór: Cancio Ximenes
