Membru seguransa iha fronteira simu ona osan ba alimentasaun
DILI, 04 marsu 2021 (TATOLI)-Vise-Ministru Interiór (MI), António Armindo, informa osan alimentasaun ba membru seguransa iha fronteira ba janeiru 2021 nian prosesa hotu ona.
“Sira nia osan ransu ba janeiru hotu-hotu fahe ona no daudaun prosesu kontinua lao iha ona Ministériu Finansa ba fevereiru nian,” Vise-Ministru António Armindo hateten hodi responde Agência Tatoli iha nia kna’ar fatin, Vila Verde, Dili, kinta ne’e.
Notísia Relevante : Vise-MI rejeita fó orden ba polísia detein Arnaldo Ribeiro
Nia dehan, razaun prosesu distribuisaun osan ba ransu tarde tanba prosesu adiantamentu relatóriu ho balansu foin bele distribui tanba prosesu foun no ida ne’e prosesu administrasaun prátika normál haree hela oinsá atu hadi’a sistema.
“Ita hatene atraza duni no konsidera problema sira, maibé buka meiu oinsá atu halo tuir dalan administrativa hodi rezolve ba oin atu labele akontese tan,” António Armindo hateten.
Nia louva servisu membru seguransa iha fronteira tanba maske orsamentu sai tarde, maibé kontinua servisu nafatin no Governu kompromete sei hadi’a situasaun sira atu labele akontese tan.
Jornalista : Nelson de Sousa
Editór : Francisco Simões
