DILI, 04 marsu 2021 (TATOLI)-Servisu saúde kontinua dezinfeta karreta sira ne’ebé transporta sasán nesesidade báziku no sasán importadu sira seluk bainhira tama hosi pontu entrada Batugade, Postu Administrativu Balibo, Munisípiu Bobonaro.
“Servisu Migrasaun loke portaun entrada tuir oráriu ne’ebé iha, mas molok sasán sira-ne’e haku’ur ita-nia pontu entrada tenke dezinfeta tuir regra saúde nian,” Vise-Ministru Interiór, António Armindo, informa hodi responde Agéncia Tatoli iha nia servisu fatin, Vila Verde, Dili, kinta ne’e.
Notísia Relevante : Fronteira Terrestre Loke Hodi Simu De’it Sasán Nesesidade Báziku
Nia dehan, kona-ba motorista bainhira to’o iha fronteira sei troka motorista sira seluk hosi Dili mak ba hodi transporta sasán sira mai Dili.
Nia parte la esplika detallu kona-ba karreta hira mak durante iha implementasaun Estadu Emerjénsia (EE) tama liuhosi fronteira mai Timor-Leste tanba seidauk simu dadus ruma hosi parte Alfándega ho Servisu Migrasaun.
Jornalista : Nelson de Sousa
Editór : Francisco Simões
