DILI, 06 marsu 2021 (TATOLI)— Iha publikasaun jornál diáriu Timor Post nian sempre fó espasu iha pájina ida ba feto sira iha rubrika profile. Maibé rubrika ne’e redasaun Timor Post deside “hasai” tiha tanba iha situasaun COVID-19 ema ladun asesu ba notísia hosi mídia imprime.
“Ami seidauk iha pájina espesiál ida ne’ebé mak haree liubá feto, maibé ami sei públika iha pájina jerál, ami iha pájina kona-ba feto nian, maibé depois COVID-19 ami halakon tiha,” Rosa Garcia dos Santos, xefe redasaun Timor Post hateten ba Agência Tatoli iha knua Timor Post, Bebora, Dili, sesta (05/03).
Notísia Relevante : Loron Mundiál Feto Valoriza Feto Nia Kontribuisaun ba Mudansa Sustentável
Rosa Garcia rekoñese katak mídia nia papél importante tebes atu promove mós feto no valoriza feto Timoroan potensiál sira, maibé tanba situasaun pandemia COVID-19 fó implikasaun maka’as ba aspetu negósiu no rendimentu, maka Timor Post deside elimina tiha pájina lubuk ida hosi pájina 24 tuun ba pájina 16, nune’e rubrika profile nian mós elimina hotu tiha.
“Liga ho loron feto internasionál, ami buka dalan hodi promove fila fali ita-nia maluk feto sira nia direitu fundamentál no sai inspiradór ba mane sira. Mídia nia papél tenke hakbesik hodi entrevista kona-ba atividade loron-loron nian hanesan doméstika no oinsá feto bele eduka nia oan sai susesu,” Rosa Garcia tenik.
Rosa hateten, feto maluk sira Timoroan barak tebes mak iha poténsia no balun asume kargu importante iha vida polítika, sivíl no militár, maibé mídia seidauk esplora ho didi’ak atu bele sai ba sosiedade.
Notísia Relevante : Loron Mundiál Ba Feto valoriza feto-nia direitu
“Husu ba mídia liu-liu jornalista sira presiza promove feto tanba feto mak sai importante dahuluk iha família no nasaun ida, feto edukadora no jestora ida tanba ne’e presiza promove sira liuhosi mídia,” Rosa hateten.
Jornalista : Osória Marques
Editór : Francisco Simões
